葉劉淑儀-葡萄

如何將 葉劉淑儀 抽到變葡萄乾嚟推廣民主

講起憤怒嘅葡萄,大家一定諗起 葉劉淑儀 ,林鄭月娥絕到令 葉劉淑儀 完全無機會入閘。只不過,除咗想 葉劉淑儀 入閘好似狗咁死咬林鄭月娥唔放之外,其實,都要學習點樣利用 葉劉淑儀 ,抽到佢變葡萄乾(咁葡萄抽水抽到乾咪變葡萄乾),然後向果啲懵盛盛嘅藍絲,特別係警察,宣傳民主派嘅理念,呢啲嘢,就正正係心戰。

大家要明白警察點睇 葉劉淑儀

我們憎 葉劉淑儀 ,呢樣嘢唔駛講,但大家要記住一樣嘢,喺好多紀律部隊,特別警察眼中, 葉劉淑儀 係好有「雷氣」嘅上級,香港嘅紀律部隊,並唔係當自己係一個professional service,大家見佢地拜關公,你就明呢班友諗嘢嘅光譜係近黑幫,講義氣,講替天行道,唔講人權同道理(你明點解彭定康喺北愛警隊改革報告,建議喺訓練同誓言度強調人權)。呢個係我近一兩年喺中環掃契丹乞兒,第一線接觸前線警員嘅經驗。好似講斷手斷腳乞兒,你講係拐子佬做,佢地就好落力咁掃,所以近排有部分地區至改為派阿婆阿公去乞。

所以要利用 葉劉淑儀 喺警察打心戰,你一定要揸住警察追求義氣呢樣嘢,話中共背信棄義,當 葉劉淑儀 喺即棄食具咁用(再粗魯啲得,不過我怕大家胃都反,費時喇),話中共無義氣,然後話無必要為呢啲政權打生打死,𢭃番份糧就夠。咁事實上, 葉劉淑儀 喺廿三條一役咁做爛頭卒法,中共連俾佢入閘攞吓彩都唔俾,呢啲除咗無義氣,對好多唔曉政治嘅人,係無第二樣解釋。呢個亦變相鼓勵啲警察,咪喺啲政治任務上咁搏命,因為政治上搏命到頭嚟,做到保安局局長咁高都係被出賣,更何況一般散仔。仲可以抽多句,如果七警案過咗五年十年,果啲伙記仲有無人會理,你睇 葉劉淑儀 就明,班友會易明好多。

仲可以講埋點解篩選唔得,如果無篩選,依家仲唔係可以投 葉劉淑儀 做特首,你睇,就係西環咁操縱,大家投票俾 葉劉淑儀 機會都無,再加埋 葉劉淑儀 果句明白點解要搞佔中嘅Soundbite,其實你已經可以打果啲唔係職業藍絲或差佬嘅心戰工作。

好似吳四海果啲人渣,果啲係職業打手嚟,所以你無法說服佢,亦無必要說服,只係大家當五毛處理得。但對現實生活你見到嘅差人,特別年青果批,打心戰仍然有用,正如我成日攞警察通例嚟講,係有原因。

發表迴響

你的電子郵件位址並不會被公開。 必要欄位標記為 *