葉劉淑儀-棄選

葉劉淑儀 無戰鬥到底嘅勇氣同策略

葉劉淑儀 因為手上嘅選委飛,同百五張飛差太遠,泛民想救佢都唔容易,再加上 葉劉淑儀 無果種戰鬥意志,一眾花生友固然少咗食花生嘅機會,而基本上, 葉劉淑儀 嘅政治生涯,應該係會走向終結。

葉劉淑儀 連唐英年都不如

唐英年喺2012年嘅選舉,雖然連番被僭建問題重創,只不過,唐英年喺選舉後段,不惜爆梁振英想喺2003年血洗中環嘅大鑊,就令梁振英只係贏咗個廢墟返嚟,中聯辦知道自己玩出火,所以北京安排咗個政協常委嘅虛銜俾佢,至少睇落係同梁振英同級,而梁振英亦唔敢對唐英年進行報復,因為無人會想同一個有攬炒嘅意志同決心嘅友仔打到最後一兵一卒,你打一個有攬炒覺悟嘅人,你同希特拉入侵蘇聯果陣一樣愚蠢,梁振英喺呢方面,係十分之識趣。

葉劉淑儀 如果想佢政治生涯可以持續落去,至少新民黨嘅政治力量唔會一下子流失,其實好簡單,就係同林鄭月娥大攬炒,未來一個月就算入唔到閘,就協助曾俊華同胡國興攻擊,佢單只贏番政治上嘅尊敬,而且林鄭月娥要郁新民黨以至 葉劉淑儀 本人果陣,亦有相當大嘅政治顧慮,呢個係以攻為守嘅戰略原則,只不過由今日 葉劉淑儀 嘅勢嚟睇,佢講就凶狠,做就碌撚。

所以希師奶呢個名,唔配喺 葉劉淑儀 身上,以戰論戰,希特拉係百分百人渣,但喺二次大戰後期,德國係不斷喺東線意圖反攻,甚至西線都係,1944年12月都仲想喺突出部突圍,呢場仗係美國喺歐洲戰場輸得最甘一鑊,雖然突出部之役達唔到預期目標,但至少德國決心爭取一個對自己有利嘅情況下戰敗,而唔係任由宰割。而好不幸, 葉劉淑儀 依家嘅選擇係非常之中國人,就係任由宰割,我可以講,呢一役後,林鄭月娥同中聯辦一定會盡力肢解新民黨,田北辰離黨係遲早問題,而公民力量班政治投機分子,甚至容海恩仲會唔會聽 葉劉淑儀 講,大家都可以估得到。 葉劉淑儀 嘅政治生涯,喺一個好唔光采嘅情況下結束。

正所謂路係自己揀,仆街唔好喊, 葉劉淑儀 由甘做中共跑腿,就被人用完即棄都唔識大攬炒攞番自己應得嘅嘢,呢啲人係自己攞嚟,值得可憐咩,大家恥笑係正常。

發表迴響

你的電子郵件位址並不會被公開。 必要欄位標記為 *