曾俊華-陳水扁

由陳水扁美學到 曾俊華 宣傳片

曾俊華 正式成為候選人首套宣傳片出場,呢套片,唔少人睇到眼濕濕。但對於2000年,見證陳水扁政黨輪替嘅我,我覺得好眼熟。 曾俊華 唔係抄,但成套片嘅美學觀,係陳水扁2000年果套宣傳片嘅公式,再加以成功香港化嘅結果

曾俊華 反映香港呢代政治人都係學民進黨

大家先睇 曾俊華 嘅宣傳片,呢套片唔係作選舉用途,只係作評論用途

大家再睇陳水扁2000年嘅經典,90秒鐘台語版平安篇廣告,呢個廣告對好多研究台灣政治嘅人,簡直係震撼教育

大家睇埋馬英九2008年縣市長撥亂反正篇嘅廣告

無錯, 曾俊華 嘅廣告,基本上係兩者嘅mix,因為 曾俊華 依家面對嘅戰場,係梁振英之亂之後,所以內容難免主題同馬英九縣市長篇一係,強調係撥亂反正,只不過,大家都知,縣市長篇出一大堆縣市長喺度9up,成個idea根本係好膠,仲要果堆縣市長,好多之後證實係人渣嚟(我一早就知),所以,前半部,甚至 曾俊華 果啲與乜乜同行嘅廣告,其實個基本理念,係走唔出陳水扁平安篇嘅經典。或者咁講, 曾俊華 將陳水扁平安篇嘅玩法放大咗,成為咗前半部嘅主軸。同埋將佢香港版咗,大大加強在地嘅色彩,唔係硬搬台灣果套,當然,好似我呢啲長期研究台灣政治嘅,仍然會睇到當中嘅台灣味道。

今日適逢係二二八大屠殺七十周年,我喺呢度,我想順便提醒一下香港人。

台灣今日嘅民主,係講緊犧牲無數台灣人嘅性命甚至人生換番嚟,所以我每次睇到228相關嘅新聞,我都好明白點解台灣人要求去蔣化,同埋點解痛恨國民黨。如果真係支持台灣嘅民主,俾台灣獨立,不論以中華民國之名(對我嚟講,中華民國呢個國號用法,同1922-1948年期間嘅Irish Free State一樣),定係好似愛爾蘭一樣走向獨立共和,呢個係必然嘅路,香港人係應該尊重,甚至予以支持。啲大中華膠唔明白係,蔣介石係保衛咗台灣,但佢雙手嘅錯,唔係佢個人嘅罪,係中華文化集體罪過,獨立後至可能講和解,一如英愛之間嘅和解,都係以1922年嘅自治領做起點。

以下係2000年陳水扁宣傳廣告美麗島篇,呢個至係香港人應上嘅一課。

發表迴響

你的電子郵件位址並不會被公開。 必要欄位標記為 *