劉夢熊-商台

評 劉夢熊 出獄後首上光明頂

劉夢熊 早上出獄,晚上即上商台《光明頂》擔任特別嘉賓,大家好想佢爆料,當然要佢爆料,唔係咁容易,因為我相信 劉夢熊 有好多涉及中共內部嘅鬥爭,加上 劉夢熊 真係一個真正嘅共產黨,所以2月27日節目,需要少少用讀中共黨史嘅人身份去評論。(我自己同佢對戰兩次,一次光明頂,一次城市論壇,城市論壇我開局就拋毛澤東,有原因)

劉夢熊 係爆咗啲料,只不過用好多廢話掩埋

你話 劉夢熊 係唔係無爆料,唔係,只不過,佢根本無意思爆俾平民聽,呢個係問題,簡單嚟講, 劉夢熊 成個節目,都係用流暢嘅共產黨語言講出嚟,共產黨語言衰啲講句,全部Encode過,你有讀黨史或者知乜事,你無讀黨史,你只會覺得佢東拉西扯。我嘗試我用我讀中共黨史經驗,去decode佢講嘅嘢。

  1. 劉夢熊 一直強調講統一戰線,其實 劉夢熊 對中聯辦嘅定性,特別對付曾俊華、胡國興,以至泛民嘅罪名係破壞統一戰線,破壞統一戰線本身係一頂好大嘅帽嚟,佢係以中共負責對港統戰人員身份,對講呢樣嘢,而中聯辦本身,係負起統一戰線任務,換言之,中聯辦啲對家應該知道, 劉夢熊 後面班友已經煮緊佢重米,佢講得仲清楚過《成報》漢江泄好多。
  2. 留意 劉夢熊 係用林彪接班人寫入黨章呢件事,嚟比喻林鄭月娥被中聯辦欽定特首呢件事, 劉夢熊 唔記得咗,香港商界無讀黨史,唔知乜事。但有讀黨史就知,就算中聯辦講到林鄭月娥係中央指定人選,只要佢被打入反黨集團,跟佢係會慘死,大家都大概了解林彪由中共第二把交椅,去到坐英製三叉㦸客機逃亡,點知被周恩來搞掂呢件事。
  3. 關於梁振英做政協副主席傳聞, 劉夢熊 用令計劃喺升到最高果陣被鬥落嚟呢段嘢嚟講,鬥倒令計劃係反映咗習近平搞政治鬥爭嘅典型手段,如果我係梁振英,未必敢升上去。 劉夢熊 又引曾蔭權爵士以有案在身為理由,唔敢接政協之位,相信曾蔭權爵士並唔係因為佢個人特別光明磊落,而係佢諗住係被人鬥死,喺香港最多坐監,喺中國被鬥一定慘死收場,曾蔭權爵士係有佢計算嘅。

當然,要 劉夢熊 講嘢,唔容易,可能要多個讀中共黨史嘅人坐喺度,例如譚志強博士,會比較好一啲。

One thought on “評 劉夢熊 出獄後首上光明頂

發表迴響

你的電子郵件位址並不會被公開。 必要欄位標記為 *