成報-淋紅油

成報 高層被人淋紅油:中聯辦持續暴走

成報 嘅server近日一直癱瘓,但好奇怪咁唔搵Cloudflare協助(我相信Cloudflare好願意助戰,但 成報 可能怕搵Cloudflare協助,變相暴露中共嘅電子戰系統,習近平未必敢俾佢地咁做),但最近 成報 嘅安全越嚟越令人不安,就係已經發展到有人淋紅油嘅地步。玩到淋紅油呢招,即係擺明刑事恐嚇。

香港警察完全無保護 成報

認真嚟講, 成報 無理由到依家都仲俾人淋紅油,以及恐嚇,就算係跨境犯案都無理由咁狼,因為依家嘅情況,其實同剃警方眼眉無分別,喺呢排警方成日被人係黑警嘅情況下,如果喺 成報 案能夠捉到人,乜唔係仲可以某程度上挽救警方形象。警方咁都唔做,好明顯係中聯辦班粉腸嘅傑作,既然係中聯辦下令做,警察就只能夠當無事發生,換言之,香港警察唔會保護 成報 ,我有理由擔心,喺林鄭月娥選情陷入低潮果陣, 成報 可能遇到更嚴重嘅刑事恐嚇,例如縱火。大家想像一下,依家嘅香港,係上世紀七十至八十年代嘅台灣,大家就估到可能有乜事發生。

由 成報 面對嘅情況,可以見到依家中聯辦係持續暴走緊,果種暴走程度,仲要係好得人驚果隻,中聯辦為咗保住手上權力,會不惜用任何手段,甚至攞人命都可以,所以我話對劉夢熊出獄後情況係關注。有人話喺監獄裡面可以搞,懲教署啲人未去到黑警果隻壞,同埋劉夢熊有乜冬瓜豆腐,一定會入政府數,所以梁振英唔會咁蠢,叫人喺監獄搞佢嘅任何仇家,但出咗獄之後,有關人等嘅安全就唔駛梁振英負責,果陣至係最危險。而以張曉明依家不惜一切嘅程度,再睇 成報 嘅處境,一切都變得好難講。

依家林鄭月娥未入閘,香港已經搞成咁,甚至林鄭月娥敗選,問題都唔一定會消失,張曉明過去咁多年,喺香港攞到幾多著數,涉及幾多油水,又有幾多利益利牽涉其中,除非中共下定決心,停張曉明職,兼且捉呢條友返去雙規,否則喺中共十九大權鬥越嚟越激烈嘅時候,條友嘅行為會越嚟越黐線,一個連太陽照常升起都講得出嘅狂妄之徒,你覺得佢會停止自己啲瘋狂行為,更何況仲有梁振英做佢嘅幫凶。

發表迴響

你的電子郵件位址並不會被公開。 必要欄位標記為 *