葉劉淑儀-提名

泛民剩低提名票,好唔好提名 葉劉淑儀 ?

2017年2月25日,係薩長同盟締結日,曾俊華先攞夠提名交表,之後胡國興亦都聲明攞足夠提名,由於曾俊華攞到商界提名,泛民有四十多票剩低。咁依家果四十幾張提名飛,好唔好俾 葉劉淑儀 ,就變成一大懸念。

提唔提名 葉劉淑儀 ,既係策略問題,亦係原則問題

希師奶乞人憎唔駛講,呢度追殺希師奶追成點,大家有眼見,由兩太港島會戰到限奶令到依家,態度係明顯。好多泛民嘅人,都無法原諒希師奶喺《基本法》23條一役嘅表現,呢個係好清楚。但由戰略而言,如果要擊敗林鄭月娥,有可能喺戰略上需要希師奶,點解需要希師奶,因為同呢個特首選舉遊戲嘅規則有關。

依家特首選舉行絕對多數制,任何人必須攞到601票至可以叫宣布勝利,如果第一次投票無人攞到601票,就只留低最高票兩位候選人,打第二輪投票,如果第二輪投票無人攞到601票,就會流選。換言之,喺依家如果要消滅林鄭月娥,唔單只需要曾俊華,唔單只需要胡國興,仲要搵條友拉林鄭月娥手上嘅極端選票。大家可以想像,如果希師奶入唔到閘,希師奶啲票會去邊係知道。如果要林鄭月娥票源唔鞏固,喺策略上,係唔係連希師奶都放埋入去,如果根據當年邱吉爾支援蘇聯果陣喺國會講,如果希特拉入侵地獄,都會喺國會為魔鬼講番句好說話嘅原則,好可能係連希師奶都送埋入去。因為用希師奶拉走林鄭月娥啲極端票,希望第二輪投票係曾俊華對胡國興,如果第二輪投票係胡國興對曾俊華,係可以最健康嘅一場戰事。

當然策略還策略,希師奶係一件仆街,果四十張未用嘅飛,可以提名希師奶,只不過希師奶攞票嘅方法,好可能係韓信胯下之辱果種情況,好可能要希師奶接受相當侮辱情況下收提名票,為佢反佔中同《基本法》23條果一役嘅情況找數。但以希師奶極希望入閘到,連泛民嘅商討日都要去嘅話,我相信用一個極膠嘅方法同儀式,令希師奶接收餘下嘅提名票,或者可以考慮。只不過,我怕希師奶根本無一百幾張土共飛,如果佢一百幾張土共飛都攞唔到,咁希師奶乜都唔駛傾落去。但我估希師奶根本攞唔到百幾多土共飛,所以問題都係喺希師奶果度。

發表迴響

你的電子郵件位址並不會被公開。 必要欄位標記為 *