曾俊華-提名

曾俊華 提名成功:香港版薩長同盟首次結成

雖然面對好多阻滯,但香港版嘅薩長同盟,喺今日終於成功達成,喺125位泛民,同35位以商界為主嘅選委支持下,結成抵抗聯盟提名 曾俊華 ,我相信稍後抵抗同盟會成功達成提名胡國興,避免咗林鄭月娥不戰而勝危機。

提名 曾俊華 嘅商界都有心抵抗

今次提名名單裡面,暫時有嘅商界人士,田北俊好明顯係堅持反抗嘅力量,佢未必係泛民中人,但由2003年23條之役、2012年唐梁之戰至今,佢企喺香港商界抵抗力量嘅前線,證明咗,商界唔係鐵板一塊,有啲人就係唔買統監府帳,田北俊呢方面,值得大家嘅尊敬,至少佢嘅腰骨比部分泛民嘅人都直。

另一個提名名單大家好值得注意,佢係爾冬陞,喺香港電影金像獎頒最佳電影俾《十年》果次,佢頂住晒所有壓力,包括佢自己親自出嚟頒最佳電影獎項,佢同演藝界一眾擦北京鞋擦到好核突,甚至好似高志森咁連藐視法庭言論都講出嚟嘅hihi好唔同,佢呢次選擇 曾俊華 ,同樣反映一樣嘢,統監府有啲無理要求,係一定要挺起胸膛頂落去。

當然,泛民呢次有lesser evil共識亦係好重要,有名嘴喺後面推長毛出嚟死, 曾俊華 一成功出閘,長毛即刻剎車,果條仆街係應該出嚟切腹問責,我暫且唔開名。

曾俊華 有個動作好重要,就係退番部分法律界嘅提名,避免佢一個人攬晒啲提名,方便胡國興入閘,我個人認為胡國興入閘,對阻止林鄭月娥亂嚟好重要,因為胡國興至有呢個份量,壓住選舉事務處同選舉管理委員會班粉腸,我有理由相信,林鄭月娥陣營後面嘅人為咗當選,乜都做得出,亦會精銳盡出。至少今日眾新聞影到何民傑,呢個咁多年嚟扮泛民,扮自由經濟支持者嘅人,今日終於露出喺中大果陣本來面目:土共嘅人

何民傑,中大學生會代表會廿八屆主席,當年佢幫土共搞中大友莊輸咗俾綠野仙蹤,跟住成班友上嚟代表會搞到個場亂七八糟,代表會亂政主要人物之一,我廿九屆做代表會主席嘅原因,本來我係嚟執手尾嘅。跟住佢扮係黃宏發傳人同經濟大右派,喺泛民潛伏十幾年,呃咗好多人,依家幫林鄭月娥做選舉代理,本相現形,呢次選舉,應該可以睇到好多人嘅本來面目。

發表迴響

你的電子郵件位址並不會被公開。 必要欄位標記為 *