運輸署-豐田

運輸署 驗車:豐田可以點玩LED牌都得,三菱就唔得

兩個月前講過, 運輸署 驗三菱用LED牌燈,諸多留難,因為無車頂好似屋嘅牌箱,驗車肥佬。依家件事有新進展,因為 運輸署 對皇冠車行,以及豐田都係極為厚愛嘅。

運輸署 放水俾豐田都放得好揚吓

以下圖片由柏斯敦巴士台提供

運輸署-三菱
運輸署-三菱

話說上次九龍灣驗車組,肥咗果架三菱小巴,查實係咁樣嘅,當時運輸署驗車組,以LED牌位置為理由,肥咗呢架車,而呢件事,我亦都同車主捷輝證實過係堅嘅。

好啦,本來應該無乜嘢,只不過,昨天有人傳張新款豐田Coaster喺九龍灣驗車嘅諜照俾我,架豐田Coaster係咁嘅樣,仲要揸咗出街添

運輸署-豐田
運輸署-豐田

留意圖中嘅新款豐田Coaster個路線牌,呢款Coaster係無車頂路線牌,因為新款設計要符合歐盟ECE-R66嘅反傾側規定,所以車頂係無位再加傳統香港小巴果隻車頂路線牌,留意吓,個路線牌係LED嘅,擺喺邊嘅,無錯個位置係同捷輝果架被運輸署肥佬嘅三菱Rosa係一樣嘅。而一般嚟講,如果運輸署驗車組班友,俾得你揸上路面測試,即係架車已經well prepared for type approval,即係原則上,政府都會批架車出牌,俾架車測試合格。

咁問題嚟,點解三菱嘅車LED牌位置一樣,運輸署要肥咗捷輝個申請,唔俾捷輝喺改動下出牌,反之,依家豐田Coaster做法一樣,運輸署就俾豐田出牌,呢次仲唔係我上次講, 運輸署 驗車,係豐田就一定pass,唔係豐田就一定唔pass,乜依家運輸署驗車組驗小巴班友,係皇冠車行請番嚟架,幾時香港 運輸署 俾皇冠車行私有化咗?

新款豐田Coaster嘅新設計, 運輸署 有無批准,呢個係 運輸署 必須向公眾交代,如果 運輸署 係批咗豐田嘅申請,咁唔該 運輸署 交代吓,點解兩個月前果架三菱係唔批嘅。如果依家批得豐田,咁點解三菱又唔批得呢,唔通豐田啲車特別啲,LED牌咁擺會安全過人,而三菱啲車咁擺LED牌,就會特別唔安全。呢件事 運輸署 係要交代清楚,否則公眾好難相信 運輸署 驗車組,係真正為了公眾安全同利益去驗車,依家只會令人感覺到,呢班驗車組嘅官僚,只不過係幫特定財團做門神,呢樣嘢對納稅人以至廣大市民公平咩?係唔係遲早要有人去廉記舉報有人公職人員行為失當,搞到老廉要派人搜查 運輸署 驗車組至肯收手呀?

3 thoughts on “運輸署 驗車:豐田可以點玩LED牌都得,三菱就唔得

  1. 上次三菱肥係肥遮住塊鏡,豐田今代用軒佬鏡臂點都遮唔倒啦。做梯前問定規格、要求先砌件野出尼,咪唔洗翻手囉

發表迴響

你的電子郵件位址並不會被公開。 必要欄位標記為 *