Trump-CNN

Trump 發神經:唔俾CNN、BBC、New York Times 去白宮記者會

本來禮拜六晚呢個時候,我應該去見周公,只不過, Trump 一個黐線嘅舉動,我都要醒一醒寫blog, Trump 竟然黐線到禁止CNN同New York Times記者出席白宮記者會,《獨立報》報導連BBC都ban埋,但未有BBC官方證實。

我以為梁振英同中聯辦會做得出嘅事,依家 Trump 都做埋,極為失望。

Trump 可以鬧人fake news,但唔可以禁止媒體採訪

Trump 做咗總統後,成日鬧媒體係fake news,大家都知你口大,所以你鬧人fake news,大家咪當你幫大家搏廣告,但禁止媒體採訪記者會係另一回事,唔單只係侵犯新聞自由,而且,以美國同英國媒體生態嚟睇,呢次喺英國同美國都會得罪一大堆人,唔只得罪左膠咁簡單。

先講BBC,如果真係block BBC,對英國人嚟講,係等同挑機,Trump block Daily Mail,大家未必有所謂,因為Daily Mail經常作嘢或抄嘢,英國人都唔多尊重呢份報紙,但BBC唔係,BBC不單代表英國媒體嘅標準,由於BBC係英國每一個國民付牌照費養,亦係英國文化象徵,你 Trump 係咪想挑戰全英國國民?仲未計World Service部分經費係由英國外交部找數,我真係想知,依家英國人仲好唔好歡迎 Trump 訪問英國。

唔俾 New York Times 一樣好大鑊,呢個係得罪佢家鄉紐約市市民最快嘅方法,紐約無乜報紙係人睇,你唔通睇小報嘅New York Post,或者睇財經為主嘅Wall Street Journal,所以紐約人好大程度上以New York Times自豪,本來紐約已經多好憎 Trump 嘅人同左膠,你依家公然挑機block New York Times,我真係想知紐約啲政客會點反應。

CNN係另一大鑊,依家 AT&T 收購緊時代華納集團,一旦AT&T收購成功,將係全美最大嘅電訊公司兼傳媒集團,你得罪全美最大電訊公司,你係咪傻咗?咁樣你同喺香港得罪電訊盈科一樣咁大劑,甚至更大劑。

加上美國一向以言論自由為傲,The first amendment係美國核心價值嘅核心價值,呢次 Trump 挑機事件,係一定有後果,有人話 Trump 可能被人罷免收場,我信嘅。如果 Trump 仲唔控制自己,國會彈劾佢係遲早問題。

One thought on “Trump 發神經:唔俾CNN、BBC、New York Times 去白宮記者會

發表迴響

你的電子郵件位址並不會被公開。 必要欄位標記為 *