Uber-保險

Uber 有保險都要嘈:你班的士車主炒牌大晒

經過重重險阻之後, Uber 終於解決到第三保嘅問題,AIG肯承保 Uber 第三保,呢件事本來係好事,唔單只可以保障 Uber 乘客嘅利益,仲可以塞住班死的士車主嘅口。點知班的士車主好明顯喺梁振英包庇惡慣,竟然惡到要去保險業監理處投訴AIG,質問點解AIG肯承保 Uber 嘅第三保。

Uber 有保險唔好咩?你班炒牌佬檢討吓

買過車都知,其實汽車保險呢行係好保守,好多新手車主買第三保都難過登天,好多時都係買份好平嘅中國平安,或者印度保險公司(係,印度保險公司喺香港分公司,我以前有車果陣買過,好膠)嘅第三保,AIG果啲邊肯賣俾你,咪玩喇。依家 AIG 肯賣俾 Uber ,其實係好深思熟慮嘅,其實做過駕駛人士都明,香港啲的士都係另一種道路炸彈嚟,相反, Uber 司機唔只乘客覺得佢守規矩,係連其他司機都覺得佢守規矩,咁耐以嚟, Uber 無點大炒過,相反,涉及的士嘅炒車係有唔少,所以AIG肯俾第三保,其實話俾大家聽, Uber 司機嘅營運手法好安全,大家放心坐喇。雖然以 Uber 咁大間公司,學新巴、城巴、九巴咁自己保自己,其實都問題唔大嘅,不過有保險公司呢啲怕死到爆嘅third-party認證,大家會覺得放心多少少嘅,可謂香港人心態。

其實呢度順便要清理一種思想謬誤,就係買咗保險安全啲,一件事安唔安全同保險無關,有啲保險公司肯受保嘅事,唔代表佢安全,正如啲新手司機,都有保險公司承保張第三保,代唔代表新手司機好安全?買咗保險,只不過代表咗,一旦一個唔該有事,受害人可以由保險公司領取賠償,唔駛吓吓要當事人上晒身,令受害人得唔到賠償。因為如果闖禍果條友破咗產,一仙賠償都收唔到,咁啲醫藥費邊個找數?政府食晒佢?因此英國佬至立法果陣,係唔係都要你幫襯保險公司,因為保險公司財力上,理論上可以找咗條數,咁就保障咗公帑唔會有損失,其實即係話叫你幫政府買保險咁解。另一方面,保險公司唔想賠到破產,亦會做一定把關工作,只係咁解。係香港啲人好奇怪,以為買咗保險就安全,我真係唔知乜嘢邏輯嚟。

發表迴響

你的電子郵件位址並不會被公開。 必要欄位標記為 *