財政預算案-min

Hea爆 財政預算案

每年 財政預算案 ,都係我作為評論員一定要做功課嘅日子,因為往往要準備第二日嘅報紙評論,但今個禮拜因為我寫咗七警案,所以 財政預算案 評論就留番喺自己個blog度。只不過,今年份 財政預算案 ,睇完之後,我只能講,一個看守政府嘅 財政預算案就係咁,有乜大嘢,都係等新行政長官組織搵新財長再算吧。

財政預算案 hea做好過益曾俊華

呢份 財政預算案 喺政治上係史無前例,因為呢份 財政預算案 嘅前期工作,係由一個依家選緊行政長官嘅人負責,亦即係曾俊華,而呢個人依家喺政治上,係處於同現政府對立嘅位置。雖然之前有傳,呢份預算案有可能係一個大花筒預算案,但如果駛錢太勁,甚至有利益輸送之嫌嘅話,現政府,甚至現政府支持嘅林鄭月娥會硬食,但如果駛錢駛得好,公眾一般會歸功於曾俊華,對林鄭月娥係無著數,以梁振英同張曉明咁精於計算,搶錢唔係時候,又怕會累林鄭月娥,所以就出咗份有史以嚟最Hea嘅預算案,除咗恢復電動車首次登記稅具爭議性,同埋大家對稅制檢討會抱持懷疑態度,大家其實都無乜嘢地方可以攻擊份預算。除咗林鄭月娥衝出嚟膠,話政府用乜嘢新理財哲學。唔知林鄭月娥嘅新理財哲學,係咪明明用1.7可以寄嘅信,用咗2.9寄俾人呢啲黐線理財哲學(甚至連哲學都講唔上)。

講真,我自己最初好怕陳茂波會亂駛錢,當然因為我對陳茂波完全無信心,但由於依家特首選舉嘅劍拔弩張形勢,陳茂波喺缺乏民意支持下,只有提出一份hea爆嘅 財政預算案 ,呢個已經係好消息。大家要記住一樣嘢,喺香港全面民主化,甚至步向獨立前,政府唔會真係為民生項目駛錢,一駛錢一定喺可以利益輸送嘅大白象,甚至如果政府突然提出全民退保,都一定唔慌好嘢,跟住一定係成棚契丹老人家送嚟香港,要香港人埋單找數,所以一份唔做嘢嘅財政預算案,好可能係對香港傷害最低嘅財政預算案。

至於取消電動車嘅豁免首次登記稅優惠,我只能咁講,依家中海油、中石化要錢喇,迫你揸番汽油車就將就吓,政府無加倍首次登記稅彌補油稅損失已經皇恩浩蕩㗎喇。

發表迴響

你的電子郵件位址並不會被公開。 必要欄位標記為 *