曾蔭權-判刑

曾蔭權 入獄二十個月:合理判刑

曾蔭權 爵士被判公職人員行為失當罪名成立,判監二十個月。 曾蔭權 爵士案呢個判決,都係好大路嘅判決,同程介南洩漏康體發展局資料被判監十八個月,以及冼錦華嫖免費妓,被判入獄兩年嘅刑期係相若。

點解係合理刑期,係咁解:

曾蔭權 爵士嘅刑期粗略分析

  1. 由於判刑嘅一刻,行政長官收受利益嘅罪行罪名未成立,需要重審,喺依家呢一刻,法庭定罪上唔可以考慮涉及行政長官收受利益果堆罪行嚟量刑,所以,法院本來就判輕咗,如果行政長官收受利益罪成,好可能就判重好多,縱使,行政長官崗位重大,本身已經係加刑因素。
  2. 雖然 曾蔭權 無認罪,但由於佢喺金融風暴期間嘅傑出貢獻,所以,法庭一口氣減咗三份一刑期俾佢,即係原本刑三十個月監禁,但由於對社會嘅特殊貢獻,獲得同認罪一樣嘅三分一刑期折扣,所以係坐廿個月,如果再減三分一假期, 曾蔭權 係坐一年多少少,其實法官已經考慮到成堆重量級嘅求情。
  3. 依家未知行政長官收受利益呢部分幾時重審完,因為重開陪審團,一切當重新嚟過,如果上訴庭唔批准等候上訴期間保釋,有機會 曾蔭權 完成咗公職人員行為失當呢部分嘅刑期,行政長官收受利益呢部分都未審完,因為呢啲咁複雜嘅罪行,聆訊連陪審團退庭商議,時間往往係相當漫長,仲未計可能要拗傳唔傳召東亞銀行啲人,甚至其他相關人物出庭。
  4. 案件嚴重程度未必搏唔到社會服務令,好似香港大學醫學院外科學系前系主任黃健靈案,雖然涉及金額都好多,但由於黃健靈判刑果陣已經超過七十歲,加上確診有好多唔同身體問題,法庭基於身體狀況,判唔駛坐監,只係社會服務令,以及之後被釘牌半年。如果 曾蔭權 證實佢身體狀況並唔許可,隨時喺醫院坐多過喺監獄坐嘅話,有機會係履行最高240小時社會服務令,呢方面喺判刑上訴果度唔係無得拗,事實上, 曾蔭權 都超過七十歲。

當然 曾蔭權 案唔會就咁算數喇,但另一方面,公眾更期待UGL案,幾時廉署會落鑊,但UGL案可能審訊更漫長,因為UGL案涉及好多唔喺香港司法管轄區發生嘅犯罪行為,果啲嘢點搜證同埋香港法院有無權審,基本上仍然好具爭議性。

發表迴響

你的電子郵件位址並不會被公開。 必要欄位標記為 *