MTR-min

MTR 斬腳趾避沙蟲並唔係辦法

MTR 尖沙咀縱火案嘅事件,實在太嚇人。政客同政府要求 MTR 交啲解決方案,都係合理要求。只不過, MTR 交出嚟嘅方案,似乎膠到一個點,就係禁止 MTR Shop 再賣任何打火機嘅嘢,當然,受害主要係車站嘅七仔同OK便利店。

MTR 高層嘅契丹化思維

其實禁止 MTR Shop 賣打火機,係唔會防止到同類事件發生,因為打火機攜帶方便,其實任何人有心縱火,入地鐵之前,走去便利店買打火機都一樣,你無可能禁晒全香港便利店賣打火機,始終便利店可以合法賣煙,就可以合法賣打火機。而打火機用途,亦唔只吸煙同縱火,去露營野餐要BBQ,你都唔會點火柴,你估日本咩,日本啲便利店仲有火柴賣,香港就租金太貴,唔可能繼續有啲咁有古風嘅嘢賣。呢種思維,其實係同契丹共產黨喺新疆,防止再有斬人事件,就連菜刀都要實名登記一樣咁荒謬,我懷疑呢啲怪招,隨時未必係 MTR 啲人諗出嚟,而係統監府張曉明呢啲白痴要求去做,因為正常嘅香港人,都唔會認為禁止車站便利店賣打火機係防範同類事件嘅有效方法。

其實港鐵要防止事件重演,有兩點我個人認為係應該要做:

  1. 學日本咁,加強乘客對不審物(無人看管物品),同行為有異人士嘅人嘅意識,並且教乘客遇到呢啲事件,第一時間如何應對,有時傻佬難防,但傻佬搞出嚟嘅災禍,係可以控制到最少嘅。
  2. 攜帶過量易燃物品嘅乘客,係要趕出入閘區,有時有啲裝修師傅,或契丹走私客,可以帶成桶成桶油漆、天拿水、甚至成箱呢啲易燃物品入車廂,呢種行為係為自己以至搭客帶嚟危險,只要遇上縱火客,或者有乘客嘅物品失火,例如有人用咗類似Note 7之類物品,又失火果陣,以港鐵擠迫程度,真係唔釀成大災難就奇。果啲帶太多易燃物品入車廂嘅友仔,港鐵係應該強硬咁趕佢地出已付費範圍。

依家 MTR 禁止店鋪賣打火機嘅做法,純粹係契丹式斬腳趾避沙蟲,蠢到加零一,除咗引來恥笑,乜嘢效果都無,但港鐵班友,都醒過伍婉婷少少嘅,至少唔會好似伍婉婷針對巴士嘅白痴建議咁,幾乎令全香港交通癱瘓。中聯辦相關人物同商界啲人智商之低,真係創作力同幻想都會嚇你一跳。

發表迴響

你的電子郵件位址並不會被公開。 必要欄位標記為 *