葉劉淑儀-佔中

葉劉淑儀 為咗票,認同佔中都得

大家都知道中國韓信胯下之辱之古仔,有啲人為求達到目的,真係乜都得。 葉劉淑儀 就係一個咁嘅人,她為求泛民選委賜提名票俾佢,竟然話佢明白點解要佔中。所以當初我話泛民可以俾提名 葉劉淑儀 ,不過要整個儀式好似乞兒咁施捨啲票俾佢,依家證明果然無睇錯人。

葉劉淑儀 想要嘅戰略位置

當然,我相信 葉劉淑儀 認同佔中論,唔係完全無顧慮過北京諗法,因為北京唔係鐵板一塊,喺佔中期間,除咗有江系啲人謊報軍情,習系有人自己睇過金鐘佔領區,所以梁振英一而再,再而三想用武力清場,都被北京否決,成個決策過程, 葉劉淑儀 應該係知情,畢竟如果乞咗啲提名入去,原來可以一張親北京嘅飛都唔見嘅,咁呢個肯定唔係 葉劉淑儀 嘅真正政治目的嚟。

葉劉淑儀 依家係咁搏提名票,一方面佢要證明自己嘅政治實力,至少要同統監府班友講明,佢都唔係任你統監府班友係咁舞,但更重要係攞可以交換嘅政治籌碼,因為 葉劉淑儀 入去,佢個政治戰略位置好微妙,佢可以鎅走林鄭月娥啲飛,佢亦可以喺林鄭月娥一旦有乜政治醜聞,好似唐英年咁衰鑊甘嘅時候,爭取做士啤軚人選,而佢呢個特殊位置入到閘,就可以同統監府,以至林鄭月娥談判,換佢想換嘅嘢,我相信 葉劉淑儀 想換,唔只行政會議成員咁簡單嘅嘢,事實上,呢個位,名堂響亮,但毫無實權,又唔講得嘢,仲衰過二次大戰日本海軍省嘅橫須賀鎮守府司令呢個朵。 葉劉淑儀 一係想換啲政府對新民黨實質扶持,一係想換若干問責局長、政助嘅位,相信林鄭月娥為避免自己啲票被鎅,要同 葉劉淑儀 做政治交易。

當然, 葉劉淑儀 嘅算盤打唔打得響,我覺得有保留,因為林鄭月娥並唔係梁振英,梁振英係精於政治分贓術嘅人,如果唔係佢果挺極左政治性格,呢條友肯適當分豬肉俾泛民,泛民瓦解咗十世都似。但林鄭月娥,係完全唔識呢啲政治利益交換,係分豬肉都會出事果啲硬膠嚟,林鄭月娥上台真係會連 葉劉淑儀 都走去佔中。但無論如何,如果 葉劉淑儀 問泛民乞票,唔該要做吓傲嬌黨,唔好學高教界同民主黨部分選委俾薯片票果陣一馬當先衝晒出嚟,主動俾票人一啲矜持都無。駛唔駛要開一個專業傲嬌課程,俾呢班友。雖然我知呢班選委,都承受都大嘅選民壓力嘅。

總之, 葉劉淑儀 依家放聲氣,入閘乜都得,新民黨有乜俾到泛民,自己deal。

發表迴響

你的電子郵件位址並不會被公開。 必要欄位標記為 *