曾蔭權

曾蔭權 爵士嘅功過,何以論斷

曾蔭權 今晚因為身體頂唔住,要住伊利莎伯醫院,喺呢個時候,其實都係時候,去論斷 曾蔭權 一生功過。

雖然 曾蔭權 因佢本人cheap嘅緣故犯法,搞到晚節不保,件事好膠。但一生人總體而言, 曾蔭權 並非大奸大惡,香港人對佢因被中聯辦政治清算,而搞成咁,係感到唔係太安樂。

曾蔭權 lesser evil 年代

曾蔭權 雖然係cheap,貪果啲小便宜真係膠味濃到呢⋯⋯但喺 曾蔭權 任內,佢至少做咗幾件事,至防止香港嘅情況惡化,甚至試圖改善香港嘅情況,單係佢做呢啲嘢,佢喺中國治下歷任首長中,應該唔會有人超越佢嘅功績:

  1. 成立監警會,並由比較中立嘅翟紹唐資深大律師主政,試圖加強警隊問責性
  2. 就公共廣播進行諮詢,試圖將香港電台變成香港廣播公司,脫離政府機制掣肘
  3. 發出DBC牌照,試圖扭轉商台封咪後嘅狀況
  4. 任用一班思想比較接近泛民嘅人進入政府,呢啲問責官員離開政府後,係做番啲似人嘅嘢,例如劉細良、陳智遠(皇都戲院保育工作,應記一功)
  5. 引進超級區議員嘅變相政改,儘管我係唔同意,但都仍然係進步

曾蔭權 無錯係一個官商勾結嘅年代,但 曾蔭權 知道香港嘅核心價值要啲乜,佢喺要回應中國同埋賣港商界訴求同時,亦試圖喺言論自由、政府內部多元化、警權呢啲問題上做番啲嘢,佢喺夾縫度,佢可以做,都可以做,唔通一個咁嘅lesser evil,大家都唔俾番一個應有嘅尊敬?所以好多泛民中人,點解會幫 曾蔭權 寫求情信,表面上, 曾蔭權 或者同泛民對立,但實際上,大家都知道,如果無 曾蔭權 ,香港社會會變得更差,一如依家梁振英統治下嘅香港,呢個係好多左膠都不能理解。

對北京嚟講,咁清算 曾蔭權 其實係大損失,點解唔少良心未泯嘅退休公務員,好似王永平,喺退休後選擇同政府對抗,甚至走入泛民陣營,因為大家知道 曾蔭權 呢個道路行唔通,有乜差錯就會萬劫不復,所以只能夠二選一,所謂第三條道路根本唔存在,甚至連同中國合作嘅道路都唔存在,好可能,港獨至係唯一嘅出路,其實都係咁解。

如果 曾俊華 呢次無法選贏特首,其實香港會走上乜道路大家心知肚明,立憲派可以做,都已經無法做落去,剩下只餘革命黨人。

發表迴響

你的電子郵件位址並不會被公開。 必要欄位標記為 *