Duraplug-min

喺香港買到 Duraplug 嘅最新跟進

之前,我介紹過點買 Duraplug 拖板,只不過喺香港買好麻煩,去英國訂,都一樣好麻煩。只不過,香港原來仲有老鋪頭,係有賣 Duraplug 拖板,呢篇文,就提供要買 Duraplug 拖板嘅地點嘅資料。呢篇文唔涉及任何廣告,因為賣果間嘢係老鋪嚟,佢唔識我,我亦路過見到問吓至知佢仲有賣。我純粹希望香港人買到安全拖板,唔好再受啲契丹拖板影響,電到傻咗都唔知。

港島仲有賣 Duraplug 嘅鋪頭

港島區仲有賣 Duraplug 拖板嘅鋪頭叫明泰電器行,一間好老式嘅電器行,詳細地址係香港上環皇后大道中377號,個鋪係咁嘅樣

Duraplug-明泰
Duraplug-明泰

間鋪大約晚上七點左右收鋪,所以如果你係夜放工,你可能要託朋友幫你手買,呢一帶鋪頭都係咁。如果你坐巴士,可以坐新巴4, 4x,城巴7, 90B,喺上環文娛中心果個站落,你過對面馬路就係明泰電器行。如果你坐地鐵,就喺A出口出,行到上環文娛中心轉入皇后大道中,向西行,喺巴士站七仔對面就係。

明泰電器賣 Duraplug 唔貴,係二百六十蚊一個,稍比德國拖板貴少少嘅,只不過,如果你係覺得安全好重要,除咗德國拖板外, Duraplug 係其中一個可以考慮嘅選擇嚟,亦都係得明泰電器,暫時喺港島區會提供現貨俾你。如果你唔想喺英國買,或者喺部分香港老牌電器行,要等有 Duraplug 嘅貨時間耐,可以考慮喺明泰電器買。

當然,呢度會繼續跟進其他可能買到安全拖板嘅地方,或者可以用得過嘅安全拖板,呢類涉及家居安全嘅內容,我都會持續咁跟,並且以無paywall形式提供。當然,我依家寫果陣,都驚自己變咗新假期咁,搞到啲老鋪頭好麻煩。只不過,由於香港有安全拖板賣嘅鋪頭太少,加上只係有德國拖板賣呢個現象並唔健康,所以我決定都係寫出嚟,並且詳細寫點去間鋪頭買。如果日後我發現到其他有賣 Duraplug 嘅鋪頭,或者有讀者肯報料俾我,又證實得到嘅話,都會以同樣詳盡嘅方法去介紹,等大家多一個,甚至幾個選擇都好,始終香港太多契丹古怪嘢。

發表迴響

你的電子郵件位址並不會被公開。 必要欄位標記為 *