曾蔭權-梁振英

由 曾蔭權 案預見梁振英案

曾蔭權 雖然未判刑,但法官已經決定將 曾蔭權 還柙監房看管,等候周三判刑,而且緩刑機會不大。相信要去到周三, 曾蔭權 至有可能即場申請保釋候審,但批唔批係未知嘅。

由 曾蔭權 案嘅處理,其實可以預見,梁振英案必須儘快採取拘捕行動,有可能喺新特首宣誓之後隨即拘捕,否則我好可能香港將會出現長期喺契丹不返嘅待罪前行政長官。

梁振英案案情遠比 曾蔭權 案嚴重

曾蔭權 案被判罪成嘅部分,係唔係無得打上訴,雖然事實已被確立,但好多程序有爭議,加上以金額論, 曾蔭權 成個行為,真係用個cheap字形容, 曾蔭權 案嘅硬膠度,恕我直言,係同果啲收十蚊廿蚊茶錢,搞到被人掟上廉署果啲case係一樣,蠢到無倫。雖然違法地cheap都係要坐㗎喇。

但梁振英UGL案,情況遠比 曾蔭權 案嚴重得多, 曾蔭權 係有交租,DBC係唔係因為收咗黃楚標利益而成立,呢點我相信日後仲有得查究落去,但梁振英UGL案,係有人收咗五千萬港紙利益,從事一啲對股東不利嘅行為,而且仲要係佢做緊行政長官期間,收緊由UGL而嚟嘅利益,呢個情節清楚同嚴重得多,如果真係掟上法庭審嘅話,後果亦一定遠比 曾蔭權 案大鑊好多。而且公眾一直期待廉政公署處理梁振英案,如果 曾蔭權 落咗鑊都要坐,梁振英唔駛落鑊,根本係無道理,會嚴重打擊香港市民對廉政公署以至香港執法機構嘅信心。

如果接任特首唔係梁振英啲人,相信新政府為咗樹立權威,一定會俾廉署放手查梁振英案,甚至叫李寶蘭返廉署繼續處理呢件案,若然如此,梁振英係可以預見佢一旦罪成,會係無得緩刑,兼監禁刑期比 曾蔭權 仲要長嘅情況下,你覺得梁振英會係點嘅反應,呢個亦係點解依家有傳,梁振英提早接任政協副主席嘅原因,佢作為政協副主席,本身喺香港唔係免死金牌,但喺中國本土,除非習近平親自出手,否則邊個敢梁振英,我相信無邊幾個公安局局長敢捉梁振英返香港。

所以,都係果句,要捉梁振英,快啲捉,梁振英係一個好醒嘅人,佢見到 曾蔭權 嘅下場,你覺得佢唔會七月一日一卸任,就即刻諗計走佬?當然,如果習近平唔俾政協副主席佢做,或者佢入到中國本土就被雙規,咁另計。

發表迴響

你的電子郵件位址並不會被公開。 必要欄位標記為 *