吳克儉

吳克儉 無得撈決定同林鄭月娥攬炒

吳克儉 係政治負資產,呢個已經係一個阿媽係女人級數嘅事實。只不過, 吳克儉 唔係一般嘅政治負資產,係核廢料級嘅政治負資產,處理不當會真係一身蟻。而 吳克儉 今日就示範咗,請錯咗呢啲厚面皮嘅廢柴,真係仲慘過福島核爆。

吳克儉 :你炒我?我同你攬炒

今天 吳克儉 回應林鄭月娥會將佢fire嘅言論果陣,佢強調香港嘅教育政策,雖然由佢直接負責(孭鑊),但喺推行果陣,都需要成個團隊支持,包括提供資源。即係咁講,無你林鄭月娥支持,我點搞出屎出嚟,你依家想同我劃清界線,無咁易,我要同你攬炒。

好明顯,林鄭月娥同barcode頭切割之前,無應承俾個好位置俾佢,例如安排香港政府駐日貿易辦事處專員呢類,可以俾佢日日去日本嘅好位佢(其實應該安排佢做香港政府駐福島雙葉町辦事處專員至啱),呢啲唔認自己廢,又要長期食政府資源嘅終極廢柴,係要炒,但炒果陣要小心,一係好似曾俊華咁,一開就講明會炒佢,有充分嘅民意支持,呢啲友仔都係欺善怕惡,所以你見 吳克儉 無點出聲,一係你就一路忍一路忍,等到選舉過後,至同大家講,呢條友已經出咗局。依家民意唔夠,個個特首候選人都話炒 吳克儉 ,依家至嚟話要炒 吳克儉 ,又無做好安撫工作,結果咪有人做咗炸彈人,成個人撲去林鄭月娥陣營果度。

梁振英幾仆街都好,有樣嘢係真,就係佢安排分贓呢方面,佢確係專家,佢係好知道點樣運用呢啲賊,同埋呢啲賊嘅心理,所以咁耐以嚟,雖然成個特膠政府變咗賊竇,但各大賊都可以全心幫梁振英搵食,如果喺古代,梁振英應該係做山賊嘅材料嚟。而林鄭月娥,呢個人喺處理分贓呢方面嘅能力,同梁振英簡直係十萬八千里遠,依家拆 吳克儉 一件廢柴,都可以玩到有人變炸彈人,如果佢做特首,恐怕成班陳茂波、劉江華、馮煒光呢啲頂級人渣,你唔炒佢,就無民望,但你留佢喺度,林鄭月娥更加食唔住佢地,因為陳茂波、劉江華、馮煒光呢啲做過議員嘅政棍,水平遠喺 吳克儉 之上,佢要玩殘你林鄭月娥更加得應手,屆時日日睇政府好似小學雞版嘅House of Cards版咁鬥嚟鬥去,香港真係多多花生都應付唔到需求。

林鄭月娥最大問題係,佢係奸,但佢唔係曹操果隻,又唔係梁振英果隻,呢啲人只會搞到天下大亂,一無是處,俾呢個人上位,大家最好攞定外國護照至好食花生。

發表迴響

你的電子郵件位址並不會被公開。 必要欄位標記為 *