善治-min

善治 嘅基礎係乜

喺2017年2月14日,當大家慶祝緊情人節果陣,對關注香港政治,特別支持遮打革命嘅人,呢個情人節,係扳回一城嘅一日,2014年10月14日發生嘅暗角七警案,毆打曾健超嘅七位警員全部罪名成立,而隨住親共政客嘅言論失控,任意攻擊法官,政府越輸越多,去到2017年2月18日,律政司為咗滅火,更加不得講明,果啲侮辱法官嘅集體示威,好多可能全部交付執法機關跟進。其實唔只關注政治嘅人,如果大家仲想香港維持 善治 (good governance) 嘅話,都應該慶幸呢次七位警員喺強而有力嘅判辭給予嘅理由下,被判罪名成立。

香港警員爭啲犯法反映 善治 開始守唔住

近年,大家開始講休班警、當更警、輔警爭住犯法,所犯嘅法,亦越嚟越匪夷所思,點解大家開始會數住警察犯幾多法,因為過往警隊 善治 失守。而1972年到1997年期間,警隊長達二十年嘅改革成果,到依家真係所剩無幾。而皇家香港警察之所以令人懷念,因為香港警察成個改革過程,係向住 善治 嘅方向走。

根據聯合國亞洲及太平洋經濟社會委員會對 善治 嘅描述, 善治 要有八個元素,呢八個元素分別係:

  1. 基於自由結社同言論自由嘅民眾參與
  2. 法治
  3. 透明度
  4. 對所有持份者嘅問責
  5. 效率
  6. 尊重社會共識
  7. 公平以及包容
  8. 及時回應社會訴求

喺香港警察有皇家封號之稱,香港警察一如其他華人地區嘅警察一樣,都係烏煙瘴氣,1969年香港獲封皇家封號果陣,華人社區最乾淨嘅警察,可能係新加坡警隊。喺呢個時候,英國人為咗香港警隊無負皇家稱號嘅份量,開始進行改革。由於香港已經有一定言論自由,亦有一定獨立司法,所以建立 善治 嘅基礎,相比起台灣以及中華人民共和國都嚟得容易一啲。喺1972年,皇家香港警察引進警察投訴科,其實呢項改革,不亞於同期設立嘅廉政公署,廉政公署既係及時回應社會訴求,加強法治,而警察投訴科,係對所有持份者問責嘅開始,主要係向市民問責。而對前線警員,為咗公平原則,亦無忽略佢地,所以七十年代,至有警察員佐級協會,令無法成立工會嘅警察,可以同管理層,有一個緊密嘅溝通。

1995年,許淇安警務處長任內,推行咗一項重要改革,就係推出抱負、目標及價值觀,呢個將警隊工作嘅內容、方向同方式具體陳列於公眾面前,改善問責之外,其實亦提升效率,以及尊重當時社會追求民主人權嘅共識,亦有助提高警隊嘅透明度。呢個時候,正係警民關係嘅最高峰,由1972年開始改革,1997年收成,其實都只係二十五年嘅時間, 善治 嘅威力,亦都喺呢度。

梁振英與 善治 嘅崩潰

喺1997年後,喺中國不斷想香港倒退嘅情況下,要維持 善治 並唔容易,但香港警隊 善治 崩潰,係比預計中嚟得慢,一方面,香港嘅獨立司法、言論自由以及公民社會對警隊仍然有一定嘅監察,另一方面,香港警隊嘅領導人,亦唔敢當社會訴求係隱形,鄧竟成、李明逵都唔敢俾警隊過於放肆。2008年,曾蔭權任內將監警會變成一個獨立嘅法定組織,加強咗對所有持份者嘅問責,呢一切,都阻止咗警隊嘅快速倒退,雖然倒退已經隱然成形。例如2009年,就發生聽人駭聞嘅警署強姦案,呢啲怪事,過往唔可能發生。

但真係令 善治 崩潰,係梁振英上任之後,梁振英鼓勵警察不尊重社會共識,唔公平咁處理遊行集會問題,亦唔回應社會對人權嘅訴求,由呢個時候開始,警察喺對付集會果陣固然濫權,而警察嘅犯罪案件,亦開始數字大幅上升。所謂嘅撐警活動,令呢啲事情火上加油,警隊以為喺高層授意下,可以唔駛好似昔日咁,處處限制使用自己嘅權力,2014年9月28日嘅佔領運動,變成咗警察腐化嘅總爆發,七警案只係冰山一角,跟住警民關係急速惡化,去到2016年,網民不斷攞警察犯罪案件嚟恥笑果陣,由於 善治 不在,市民亦唔需要尊重警察,由1972年起嘅改革成果,大部分被梁振英消磨殆盡。

好多警察唔明,其實佢地所受嘅尊重,係1972年至1997年連串改革嘅成果,自己身在福中不知福,依家被市民唔尊重,一切返回原點,而唔知反省,我只能講,依家嘅警察,對自己嘅歷史,以至對世界各地對 善治 嘅要求,都知得太少,只係聽信一班受僱於當權者嘅盲毛吶喊助威。

後話:由2月19日,逢周日深夜我都upload一篇長文,系列叫星期日休息,一啲比較長嘅文,我寧願大家慢吞細嚼,部分我打算寫嘅書《香港論》嘅文,亦會喺星期日休息系統,優先刊出。

發表迴響

你的電子郵件位址並不會被公開。 必要欄位標記為 *