新假期-中大

新假期 班大帝介紹食肆果陣,唔該顧慮一下當地嘅人

今天CUHK Secret發咗個post,指 新假期 班大帝,出文去介紹中大敬文書院間coffee lover,搞到周六好多人搭唔到校巴。我讀大學果陣,做過范記膳委同逸夫膳委,以頹聞名嘅中大canteen竟然得飲食雜誌推薦,當然值得高興(大家諗吓我大學果陣,因職務緣故日日食頹飯係幾地獄嘅一件事)。但 新假期 唔理中大交通狀況,去推介啲人去敬文嘅canteen食嘢,講真,亦太置中大人嘅利益於不顧。

新假期 班友知唔知校巴唔係俾你外人坐

由於UGC班仆街,認為可以狂收契丹學生,但依家讀緊嘅學生,係可以爬山強身健體,所以一直拒絕提供充足嘅校巴資源,亦係呢個緣故,中大規劃校巴班次果陣,主要以服務宿生同走讀生為主,外面嘅人入嚟中大用校巴資源,基本上係不受歡迎。所以一度假日校巴收外人五蚊學費,呢個政策我有份訂,主要係要趕絕班龍友搶校巴資源,因為校巴唔係俾你班友咁用。

本來中大起新書院,由於中大地理環境緣故,已經校巴資源緊張,你依家仲要成班飲咖啡嘅友仔衝入去,好多逸夫、敬文啲宿生,真係多得你班大帝唔少。 新假期 最仆街係,話門口可以泊車,OMG,乜中大啲路可以準備容納一堆外面嚟嘅車嘅咩,一堆唔熟中大環境嘅硬膠司機為咗美食入去,中大啲交通唔亂過亂世佳人就怪。

新假期 近年備受批評, 新假期 好多編務手法係有問題,所以被認為係只不過另類content farm,但有啲嘢係衰過content farm,就係介紹食肆果陣,唔顧食肆所在地嘅環境,同埋有大批食客入到當地嘅負面影響,呢啲分分鐘仲可能影響到同學嘅正常學習,乜你班記者同編輯,唔可以多少少同理心,幫果個社區嘅人諗諗嘅咩。

中大啲食肆要生存,有多啲大學以外嘅食客,本來係好事,因為好多時大學啲頹canteen,都以無錢賺,無食客作為頹嘅理由,如果有多啲食客,當然會有助保留啲好嘅食肆,改善中大人嘅生活質素,但都係果句,中大嘅校巴同交通服務,同樣係需要顧慮,中大嘅交通系統已經壓力好大,無必要令壓力更大。

發表迴響

你的電子郵件位址並不會被公開。 必要欄位標記為 *