曾蔭權案-min

點解 曾蔭權案 控方無傳召李國寶、鄭經翰、黃楚標

喺成個 曾蔭權案 中,有一個問題令我好納悶,但係由於怕藐視法庭,所以我一直無分析,只不過,依家連做過廉署調查主任嘅林卓廷MP都出聲,加上陪審團已被解散,喺律政司未入新公訴書前,我都提出我嘅疑問,就係點解 曾蔭權案 一直指 曾蔭權收受利益,但收受利益相關嘅各當事人,包括李國寶、鄭經翰以及黃楚標,全部都無傳召到庭上作供,甚至連檢控都無,成件事令人極為納悶。

曾蔭權案 :收受利益犯法,咁提供利益呢?

一單懷疑貪污案,收受利益果個固然係犯法,但提供利益一樣犯法,所以廉政公署正確嚟講,應該查晒兩邊,亦告晒兩邊,如果是但一面罪名成立,但是但一面就完全無告過,除非有非常明顯嘅協議,否則好少唔告其中一方,但就算喺協議下,律政司唔告是但一方,唔駛被人告果一方,大多數都會成為控方嘅污點證人,去協助控方指證另一方。如果因為有人做咗污點證人,而唔告其中一方,公眾都會認為合情合理,而且符合公眾利益。

但依家好奇怪,成單案嘅報導,鄭經翰、黃楚標、李國寶三個大名成日喺度飄嚟飄去,但至今廉政公署,仍然未有跡象會拘捕或檢控呢三位,有可能向曾蔭權提供利益嘅人士,咁成單公職人員行為失當,甚至收受利益嘅罪行又從何談起,既然檢控得收果個,咁被指俾果個,點解至今仍未作出檢控,有無人可以向公眾解釋一下。而呢三條友又唔係污點證人,至少完全未見過呢三條友,有喺法庭作證,並且協助控方檢控。呢件事,令好多公眾人士,甚至識法律嘅人都感到滿腦疑團。

仲要最奇怪一點係,喺許仕仁案中,東亞銀行向許仕仁提供大量奇怪貸款,其實呢部分,廉署係有責任追落去,並將相關人等拘捕,以及檢控,但許仕仁案搞咗咁耐,收果個同俾果個都被檢控,但東亞銀行至今紋風不動。而呢次更怪,東亞銀行紋風不動,被指收果個,依家中咗一條公職人員行為失當,但被指俾利益果班友,至今仍然無任何聲氣會檢控呢啲人,咁究竟香港廉署依家嘅調查政策同檢控政策係點嘅呢,點解出現呢啲咁令人大惑不解嘅情況,有無人可以指點迷津一下林卓廷,或者好似我咁嘅小市民?

發表迴響

你的電子郵件位址並不會被公開。 必要欄位標記為 *