曾蔭權-min

曾蔭權 罪成,應立即拘捕梁振英

曾蔭權 案有初步判決,第一項收益利益罪,由於陪審團無法作出有效裁決,所以要解散陪審團擇日重審。第二項公職人員行為失當罪成立。由於涉及重審,有部分涉及案情,特別傳召證人問題,我唔作評論,以免藐視法庭。

但廉政公署,依家有件更重要嘅事,務必喺三月人大政協兩會期間之前做,就係就UGL案拘捕梁振英。

曾蔭權 都有罪,更何況梁振英?

依家一直有傳,梁振英好可能喺未卸任特首都好,仍然獲委任為中國全國政協副主席,我覺得好奇怪,因為一般唔會喺做緊特首期間兼任中國國家領導人工作,就算係虛銜都好,都係禮數不合,唔似共產黨習慣。

但如果依家梁振英有可能因UGL案被捕,就另計,如果梁振英喺今年三年獲選為中國全國政協副主席,然後以公務為理由,由佢上任政協副主席果一日起請假甚至辭職,之後唔返香港,咁根本無人吹得佢漲,除非北京主動交人。但由於香港同中國之間並無引渡協議,而中國公安,係唔會拉國家領導人,咁樣,梁振英就可以一世都唔駛面對UGL案嘅罪責,只要佢唔返香港。本來梁振英三月特別被選為全國政協副主席呢個傳聞極怪,因為極唔合常理,中共無理由咁做,但如果依家涉及UGL弊案,而呢筆弊案入罪機會率仲遠大過 曾蔭權 嘅話,梁振英嘅後台做呢啲怪事就好合情合理,總之就係梁振英唔會受法律制裁,呢個對中國同香港嘅反貪事業,都將會係一大打擊嚟, 曾蔭權 係錯,但梁振英錯嘅程度高好多。

所以依家唯一做法,就係儘早拘捕梁振英,等北京唔可以,亦唔敢委任梁振英做全國政協副主席,同埋要即時限制梁振英出境,梁振英最後有無罪,要睇廉署提嘅證據,同律政司司長會點打,但依家呢個可能陰謀係客觀存在。特別梁振英喺三月辭職嘅話,由於已經剩番幾個月任期,根本唔會對政府運作有重大影響,對梁振英嚟講,梗係要保住自己緊要啲,唔通真係等落任之後,早上六點幾成棚廉署調查主任上門召佢返去飲咖啡咩。而依家UGL案證據清楚,公眾會期望,廉署儘早採取行動,一如對 曾蔭權 嘅處理方式,香港人至會重拾政治信心。

發表迴響

你的電子郵件位址並不會被公開。 必要欄位標記為 *