郭榮鏗-min

郭榮鏗 嘅擔心唔係無道理

郭榮鏗 表示,擔心有民主派選委甩轆,等到月底公民推薦嘅結果再作提名會出事,促請喺2月24日就好叫選委交提名表。雖然一眾選委都係經歷過選戰嘅大人,但 郭榮鏗 擔心有人甩轆,我又理解。因為香港人喺緊要關頭處理文件,係有甩轆可能性。

梁振英政府隨時收緊文件要求

呢次特首選舉,梁振英擺明偏幫林鄭月娥,呢個盲都睇到,依家唔知負責呢次選舉嘅選舉主任,可唔可以不偏不倚做嘢,如果曾俊華或胡國興是但一個,可能只係攞得一百五十幾張提名,只要有人玩雞蛋裡面挑骨頭,有幾張提名表係被人DQ咗,咁就足以可以令林鄭月娥不戰而勝,呢啲大馬式茅招,其實都唔難估到,所以處理文件果陣,唔單要慎重,而且早啲交表嘅好處係,就算有人有乜冬瓜豆腐,都可以即刻補入表,或者改咗份表去補救,呢一點係好重要。

至於港大 popvote 果個公民提名系統,好唔好等佢,我覺得無必要等,首先, popvote 嘅結果,照依家走勢係加強幫曾俊華背書,梁國雄攞唔攞到足夠嘅飛去提名係疑問。但我更大疑問係, popvote 解唔解決得到, Telegram無OAuth功能嘅問題,雖然有公司利用 Telegram bot技術,去達到類似 OAuth嘅結果,但一個唔係open source嘅project,能唔能夠迅速補救錯誤,我個人係非常懷疑,好似 popvote 咁複雜嘅 project ,其實最好係open source,然後匯聚各方有心人力量,變成唔只對香港,而係全世界都有用嘅嘢,但依家嘅情況,我懷疑只係膠。呢個未計,啲人可能仍然感到無信心,根本唔敢用。

當然,法律界雷霆救兵嘅做法,都係可以考慮。法律界三十張選委飛,有十張提名曾俊華,十張提名胡國興,另外十張,同時簽咗提名曾俊華同胡國興,相關嘅表格由陳景生御用大律師保存,胡國興同曾俊華是但一個唔夠飛,就攞出嚟救人。呢個方法好公道,雖然我係 lesser evil派,但要lesser evil效用實踐到極致,胡國興同曾俊華同時入閘都係有作用。

發表迴響

你的電子郵件位址並不會被公開。 必要欄位標記為 *