國會-min

國會 與武館

今日有人問曾俊華,如果再遇到果啲激進議員點回應,佢話佢有能力KO對方。當然,曾俊華嘅回應唔係重點,因為個記者問題好蠢。當你知道英國 國會 係世上歷史悠久嘅武館之一果陣,香港人就唔應該對議會打交有任何要大驚小怪嘅地方。

英國 國會 由揸刀開片到小學雞互噓

依家英國 國會 大家見到PMQ時段,朝野兩邊互抽水,互派膠,互噓人,好似成班著西裝嘅小學雞。當然,英國 國會 搞到好似一個墟咁,本身有佢歷史來由。你睇英國 國會 地下條紅線嘅來源,就會明白。果條紅線係分隔朝野雙方,距離係啱啱好兩把長劍,因為英國 國會 早期啲議員都係武士嚟,武士可以帶武器入議會,一言不合可以開片或決鬥都得。簡單嚟講,英國 國會 本來係武館嚟,成班武士為國家大事隨時都開得片。只不過,係咁打打殺殺唔係辦法,所以開始有規矩,例如任何議員都係對議長講嘢,唔係直接回應某某議員,跟住又劃紅線,但去到1976年,反對黨保守黨影子工業大臣夏舜霆被成班工黨左膠係咁唱工人歌激到彈起,用儀仗用嘅果啲棍打工黨議員,被人趕咗出去半日,果次之後,英國 國會至再無打交事件。

好多香港人,以為 國會 嘅本質係一班紳士議政,其實連英國本身,都唔係紳士議政,當然無人認為 國會 開會開片係合理,但有時候,你唔俾人開片,就要有另一啲嘢,作為政客政治表演嘅舞台,始終今日嘅民主政客係要向本身支持者交代。所以喺英國,首相俾人狂噓,開會亂到學生會咁,美國係拉布可以拉到天荒地老,日本國會議員就走去投票果陣牛步抗議(行到慢過龜),台灣就首次國會政黨輪替後,已經無必要打交。

但係香港議會係點開會,土共鍾意趕邊個就邊個,梁君彥同陳健波都係一啲唔講道理嘅擦鞋仔,香港議會嘅表現,講真只係虛偽透頂嘅演出,無幾可係議事,亦無幾可以係精彩表演,大家只係睇到維持喺光榮革命前果種皇權暴力。真正嘅議會暴力嘅來源,其實係當權者唔向人民問責嘅權力壟斷,以及議員無法做任何事去實質服務市民。依家啲議員,只不過淪為派福利嘅聖誕老人。我寧願有時議會有人掟嘢,好過日後變成真正嘅街頭革命。英國人因為容許議會做小學雞,所以英國未曾喺斷頭台上為政治切人個頭,大家睇路易十四嘅皇權,最終喺路易十六果陣爆發嘅革命,令幾多人嘅頭切咗落嚟。

發表迴響

你的電子郵件位址並不會被公開。 必要欄位標記為 *