潤膚露-min

防敏 潤膚露 實戰指南

消委會公布 潤膚露 測試指南,得四隻無各類防腐劑、羊毛脂等高致敏成分,仲要有兩隻,我以前自己引入過賣嚟香港(即係 Aveeno Baby Eczema Therapy 同埋 Eucerin 兩隻)。我以前自己入 潤膚露 (我依家仍然係少數賣 Keri Lotion嘅傻佬,但無乜生意喇),因為我自己就係一個濕疹會痕到跳舞嘅人。

我用我嘅實戰經驗,去補充一下買防敏 潤膚露 嘅經驗:

防敏 潤膚露 實有代價

  1. 一般嚟講,防敏 潤膚露 會貴,因為你無晒啲防腐劑,其實果枝 潤膚露 只可以擺一年多啲貨仔,對零售商嚟講,如果啲貨去唔到,唔係變死貨,係變廢物,損失係好大。所以唔好介意,啲防敏 潤膚露 收成兩舊水,唔係賺你賺得多,而係以香港人果種唔捨得用嘅消費習慣,如果唔每枝毛利調高啲,餓死自己都似。
  2. 香港法律唔要求 潤膚露 標明成份,呢個係對消費者唔公平,但消費者睇唔睇得明啲化學成份,本身都係一個問題嚟。我自己識睇,一般會知Methylparaben、Propylparaben、methylisothiazolinone呢啲成份要避,一般消費者識條鐵咩。呢個係需要消費者教育,香港消費者喺呢方面所收資訊,遠比英美消費者為少。無計喇,香港就係一個官商勾結,利益輸送嘅地方
  3. 對唔識呢啲化學成份嘅人,其實最實食無黐牙嘅方法,係認住美國The National Eczema Association嘅標誌,好似下面張圖。有呢個認可標誌嘅產品,至係真正科學驗證過,可以用喺濕疹病人嘅產品,無呢個標誌嘅千祈唔好買,你買咗實中伏。
  4. 潤膚露-nea
    潤膚露-nea
  5. 如果想知道邊啲產品確實得到The National Eczema Association嘅認可,可以去https://nationaleczema.org/eczema-products/,呢啲資訊,你等每年消委會同你驗,真係嘥鬼氣,不如自己上網搵資料好過。因為美國有強大嘅濕疹患者社群,香港濕疹患者幾乎都係單打獨鬥,好鬼慘情

所以我話我自己從商,有時係自救多過想賺錢,因為想喺香港買啱自己嘅嘢,真係有啲難度。你話政治唔關你事,其實政治好關你事,不過你唔知啫。

6 thoughts on “防敏 潤膚露 實戰指南

  1. “我依家仍然係少數賣 Keri Lotion嘅傻佬,但無乜生意喇”…… 請問可否賣一枝 Keri Lotion 比我? 又或者話我知香港哪𥚃還有在賣? 感激不盡!

發表迴響

你的電子郵件位址並不會被公開。 必要欄位標記為 *