林鄭月娥-雞-min

乜話?你話 林鄭月娥 係雞?

林鄭月娥 選戰打咗咁耐,柒事多到我唔識數,你以為佢未柒完,錯喇, 林鄭月娥 辦公室啱啱發放段新片,只不過係舊同事講吓 林鄭月娥 嘅為人同生活點滴,抄曾俊華嘅打法,都可以錯到你諗唔到。余黎青萍話 林鄭月娥 似雞 有五德。

我睇完之後,笑咗。林鄭月娥係咪搵咗班火星人打選戰架

林鄭月娥 離地到雞係乜意思都唔知

對於一個買廁紙都可以派膠,寄選舉刊物都可以俾突郵費嘅膠人,我唔會低估佢嘅離地度,但唔至於離地到唔知雞對女人嚟講,係辱罵嘅用語,你話一個女人係雞,我話知你原意係讚佢定彈佢,都會諗到話佢係妓女咁解。至少喺香港粵語呢個context,一定係咁解。否則唔會果次有高登仔將《夢中的婚禮》加上歌詞為「雞,全部都係雞」,係引嚟一啲道德X嘅微言,因為雞喺香港語文,係有佢嘅特定語意,而呢個語意對女人係帶有侮辱同歧視性。

就算 林鄭月娥 自己唔知,佢啲公關團隊嘅人,無理由唔知雞喺香港語文係乜意思話,公關團隊嘅人,無勸 林鄭月娥 唔出呢段片?或者叫余黎青萍改改段片,以免被人cap圖恥笑。喺網嘅人,大部分都唔係啲藍絲五毛,而係好似我呢啲,會上高登,平日用高登話講嘢嘅人,當出現字幕話 林鄭月娥 似雞果陣,仲唔成班友出聲笑佢,無乜可能囉。

仲要 林鄭月娥 公關團隊,喺sex related嘅嘢衰過一鑊甘,上次we connect事件,仲未膠夠,依家又嚟一劑話 林鄭月娥 似雞,呢班友係唔係對呢啲涉及性相關嘅用字全無敏感度,如果呢隊咁嘅團隊做其他嘅PR Project,啲客唔俾佢玩殘就出奇。肯定啲笑話同二次創作,搞到成個品牌嘅形象崩潰,炒咗隊PR Team都於事無補。

由呢次事件,我真係懷疑 林鄭月娥 團隊搵咗班火星人打選戰,唔好講民生議題,係連香港人一般嘅生活用語上禁忌都唔知,衰過殖民地啲官僚,當 林鄭月娥 本人連團隊徹底離地果陣,我真係懷疑選戰打完之後,香港啲花生、杏仁、開心果等可以攞嚟食嘅堅果,有幾多仲存在喺世上,會唔會被香港人食晒,因為呢隊team嘅人太膠,膠到太離譜。

發表迴響

你的電子郵件位址並不會被公開。 必要欄位標記為 *