疲勞駕駛-min

防止 疲勞駕駛 職業司機最需要標準工時

台灣果單旅遊車車禍,依家發現唔係架車有問題,而係旅行社狂要司機OT,根本係 疲勞駕駛 , 疲勞駕駛 其實係一種好危險嘅行為嚟,你將幾十條,甚至過百條人命嘅安全,交俾一個無充分休息嘅司機度,呢啲行為未免太玩命。

疲勞駕駛 係要防止

大家都知,飛機師同機組人員係有最高工時限制,如果當值超過一定時數,就唔飛得寧願on ground,因為人命安全永遠第一。其實,喺西方國家,某啲特定車種嘅司機,都係有類似最高工時限制,如果開OT超過某個鐘數,就要強制off duty,否則可以釘牌,例如喺澳洲高速公路,你見到以下叫road train嘅龐然巨物,果啲司機係受特定訓練,而呢啲司機嘅工作時數,亦同飛機師一樣受特定限制,超時工作係要抄牌

疲勞駕駛-road train
疲勞駕駛-road train

如果我話,香港要搞標準工時,或最高工時由邊啲行業開始,一定係職業司機,特別係必須行駛高速公路嘅大型車輛司機,其實之前香港都有 疲勞駕駛死過人嘅案例,好似旅遊巴、專利巴士、貨櫃車司機呢啲孭大量人命,或者一旦炒車一定釀成慘劇嘅車種,可以實施類似澳洲road train司機嘅管制,如果連續工作若干鐘數必須休息,否則視作危險駕駛論,東主強迫司機開工必須負上刑責。以公眾安全嚟推行最高工時,大家唔會反對,因為就算保險公司,都唔會同時呢啲搵命搏嘅揸車方法,特別你話香港啲高速公路係唔係安全,好似屯門公路呢啲彎多兼且高低起伏不定嘅舊公路,或者大量喺高速公路出現,俗稱叫快線撚嘅硬膠司機,明明自己架車慢仲要霸住條快線揸五十公里,呢啲白痴固然要抄牌,但 疲勞駕駛 司機遇上呢啲白痴司機,亦會炒劑勁,結果梗係死傷慘重。

我唔係左膠,有啲行業喺本質上,亦未必適合標準工時,例如金融、新聞、程式開發等等,可能一個更靈活嘅上下班模式更重要,但有啲行業,基於安全因素,最高工時可能係必需,除咗司機,另一個需要最高工時嘅行業,其實係醫生。醫生經常超時工作去斷症,其實大家有無覺得好牙煙嘅咩,人命嚟喎。當然,香港亦好不幸,好多人對呢啲危險根本視而不見。

發表迴響

你的電子郵件位址並不會被公開。 必要欄位標記為 *