曾俊華-曾connect

曾俊華 為泛民帶嚟嘅壓力

對林鄭月娥嚟講, 曾俊華 啲招數相信再抄落去,只會抄到自己死埋。 曾俊華 喺黃昏時間放出一段「曾connect」嘅片,個hashtag「realconnect」已經抽到林鄭月娥乾晒。但更攞命係, 曾俊華 段片係播出嚟,佢直接打電話俾曾經喺facebook留過言,留過電話嘅市民,交流番對教育政策嘅睇法。呢種有少少似軟硬天師老人苑玩電話嘅打法,喺香港選戰未試過。

其實,呢個就係 曾俊華 為泛民帶嚟嘅壓力,呢個亦係點解泛民唔係堅搞真普選嘅原因。

今日有普選, 曾俊華 都會贏

如果今天有真普選,唔係689政改方案果個伊朗式普選,泛民根本唔知有無政客夠料同 曾俊華 呢隊人砌,好可能係不堪一擊,望風而潰,然後泛民堅係完成咗歷史任務,變咗一盤散沙。

由以往到依家,泛民最大危機都係偏離民情,特別喺班左膠騎劫之下,長期講啲同民情不符嘅政綱,以為自己要建立一個烏托邦。泛民嘅存在,本來就係一個lesser evil嘅結果,泛民係膠,但土共更膠,所以我投個lesser evil入去,去抗衡呢個政府。所以我呢個右派,曾經喺2000年新界東投票支持梁國雄。邊個話選舉係選賢與能,香港人從來都知道呢個game係乜嚟。

當香港堅係有民主,例如成為一個獨立嘅議會民主國家,如果再無共產黨果陣,香港人會選點樣嘅政客入議會,工作能力,中庸政綱,與民眾溝通能力,全部都顯得好重要。 曾俊華 果隊人,好明顯係開始進入狀態,上午抽完林鄭月娥嘅李波式情書,下午就玩直接打電話同市民溝通,展現出曾經在彭定康政府成員應有嘅功架。如果泛民日後要對住呢隊咁嘅人,你覺得選情會有點嘅結果。如果唔係因為香港硬膠嘅比例代表制,相信好多民主派政客一早已經玩咗完,唔可能繼續做議員。

好明顯,依家香港出現咗隻黑天鵝,唔知最後統監府會唔會監粗捧林鄭月娥上去,但如果監粗捧上去,我可以講,後果將會極為嚴重。唐英年受人同情,但唔係受人支持。依家唔係,一班淺黃同淺藍合組嘅薯粉力量集結當中,如果北京有違呢股力量,之後嘅反彈力,我其實唔識計。而泛民如果以為自己可以繼續抱住光環選落去,我食住花生睇下屆國會選舉,或區議會選舉,各位將會輸到當底褲都未掂。

發表迴響

你的電子郵件位址並不會被公開。 必要欄位標記為 *