TVB-收購戰-min

TVB 管理層應該斷定咗中國傳奇係敵意收購

TVB 股權之戰越嚟越有花生味, TVB 大股東似乎意識到中國傳奇有可能係敵意收購,將回購建議購買股數減少,但將每股收購價加15%,變成每股35蚊,照今日收市價睇,有五蚊嘅溢價,呢個溢價水平應該吸引到部分 TVB 小股東接受收購建議,因為一啲溢價都無嘅話,你係 TVB 小股東,都寧願等食花生,睇吓中國傳奇會唔會出個靚價收購自己手上嘅股票喇,難得權鬥變成一場收購戰。

TVB 大股東能否捍衛控制權言之尚早

只不過,以黎瑞剛為首嘅 TVB 大股東集團,能否捍衛自己嘅控制權,我覺得係言之尚早,點解我咁講,原因係咁:

  1. TVB 大股東寧願減少回購數目嚟加價,即係話, TVB 大股東未必有太多子彈去趕走中國傳奇呢個不速之客。當然亦可能想試探中國傳奇會唔會出個靚價出嚟,真係打收購戰。只不過,以陳國強、王雪紅同黎瑞剛資本背景嚟睇,陳國強只係操盤手,唔會攞真錢出嚟,王雪紅喺HTC同威盛電子嘅經營上焦頭爛額,好大機會呢次回購嘅資金來源係黎瑞剛,黎瑞剛後面江系班友嘅資金鏈,係唔係堅成咁先?
  2. 如果呢次中國傳奇後面有龐大資金,真係提出一個高溢價進行收購,例如嗌到四十蚊一股去收購,咁果陣時,好多大股東會拒絕回購建議,屆時果三條友係唔係準備好鬥嗌四十蚊一股去爭先?依家柯清輝先否定對方嘅實力,但以 TVB 呢次提高溢價嘅舉動,好明顯知道對方並唔係流料,而且對方呢班友並唔係果啲好似禹銘咁嘅股壇狙擊手,狙擊果啲有大把cash又唔知做乜嘅公司(例如中華巴士),然後乘機用收購戰迫大股東嘔番啲現金出嚟賺一筆。以 TVB 嘅戰略地位,明顯係一場政治收購。
  3. 大家留意一樣嘢,有線電視控制嘅奇妙電視,唔向廣管局申請頻譜,好可能同股權將會易手有關,等易手後由新股東申請頻譜,並負責有關投資。一般收購合併嚟講,唔清殻嘅收購合併,喺郁手之前都唔會有大動作,特別依家可以做緊盡職審查,更加唔適合向通訊局申請頻譜,而如果收購有線電視係江系人馬,咁 TVB 收購戰習系隨時更提高價,屆時乜事都可能發生。

面對呢啲政治收購戰,食花生最好,睇吓 TVB 大股東會唔會提高溢價到四十蚊,如果有人將收市價炒到同新回購價一樣,就肯定有啲嘢發生緊。

發表迴響

你的電子郵件位址並不會被公開。 必要欄位標記為 *