自拍-min

自拍 係要?拍片都係要,但都要顧安全架

喺星期五晚港鐵尖沙咀站縱火案裡面,最多人批評,唔只凶徒縱火,仲有係成班市民不顧安全拍片。而喺兩日後舉行嘅渣打馬拉松,又出現一啲涉及手機攝影嘅危險場面,就係起步果陣 自拍 。過往都有跑手起跑果陣 自拍 ,搞到成班跑手撞埋一齊,有人受傷嘅事故。但仍然有人唔聽大會呼籲,不顧他人安全咁 自拍 。

食花生重要 攞威都重要 但安全都好重要

商業機構,每個like都有價,對100毛,係代表幫商戶做特約轉載廣告收入,對我嚟講,page每個like都可以換成廣告收入,咁呃like簡直係生命添(呢個亦係點解我鼓勵捐款,因為呃like好易變咗金content farm)。但對大部分facebook user嚟講,可能果刻好具紀念性,可能果刻呃成堆like好威,但代價係乜?值唔值?應唔應該因此而危害到其他人嘅安全?

喺重要時刻自拍,都係嘅,喺重大事件為食花生,都應該拍片或影相,為歷史留低紀錄,只不過,安全仍然係第一優先。好似馬拉松起步果刻嘅英姿,或者跑緊果刻嘅英姿,我寧願你俾錢俾大會指定果啲攝影公司再買張相。因為起步安全係無價,如果有人因自拍而喺馬拉松受傷,呢樣嘢聽起嚟,係kai過唔kai嘅事,何必呢?

至於禮拜五晚港鐵尖沙咀縱火案,平心而論,在場市民即時影低嘅紀錄,係為澄清事件真相提供咗好多資料,如果無市民提供嘅第一手資料,啲料經過香港傳媒手上,喺中聯辦嘅指揮棒下,一定變得好政治抽水味濃,唔單只無咗應該嘅理性討論,仲會因此陰謀論滿天飛,因為市民其實唔信傳媒。但拍片拍相以外,係唔係應該有人先救火。呢次好彩,係純粹火災,如果呢次係東京奧姆真理教果隻玩法,我諗啲相同片,唔係大家喺facebook睇,而係攞晒去死因裁判庭作呈堂證物之用,咁又何必呢?

都係果句,香港人好多安全意識係有待改善,香港長年過於太平同安全,如果一直可以維持好景當然無問題,但花無百日紅,更何況,英國人留俾香港一重又一重嘅制度防護機制已經潰爛,你認為你可以好安全咁食花生玩自拍?

發表迴響

你的電子郵件位址並不會被公開。 必要欄位標記為 *