階級鬥爭-min

社民連幾時變成 階級鬥爭 為綱嘅政黨

支持曾俊華、胡國興入閘與否嘅爭論,好多泛民左翼都醒咗,但一個好大嘅例子,係社民連本身。由佢地嘅言論,我聞到佢地以 階級鬥爭 為綱嘅面目。

階級鬥爭 為綱嘅本質暴露

而且要看往績。胡官在法院任職,長毛則出身基層,通過直選成為資深議員。過去胡官對民主有何特別付出?我不覺得胡官的往績代表到民主派;也不覺得胡官的立場代表到民主派。

以上呢句話,唔係乜嘢共產黨人講,係黃浩銘喺facebook講。上述說話,對我呢啲對中共黨史嘅人,只會諗到一樣嘢,就係 階級鬥爭 。你出身唔好,成份唔好,你做幾多好事都係假,要鬥垮鬥臭。好彩黃浩銘唔夠熟胡國興,否則胡國興出身油麻地嘅望族,恐怕呢個罪名更大,真係任何人提名佢都係階級罪人。

其實由佢地對曾俊華、胡國興嘅偏見,反映社民連已經淪落成 階級鬥爭 為綱政黨嘅面目,其實對黃浩銘本人都危險,黃浩銘呢啲人,照以往中共階級分類方式,係富農,係地主,一樣要攞去批鬥。同樣,依家社民連要人吳文遠,出身富裕家庭,其實有啲似胡國興果種情況,如果黃浩銘對胡官都咁大意見,咁點解要支持吳文遠代表社民連?吳文遠成個階級敵人滲入社民連裡面,如果社民連啲人學起毛澤東真係同你講乜嘢以 階級鬥爭 為綱,仲唔係首要清理嘅對象?

一個誠心誠意喺左翼運動嘅人,係唔講 階級鬥爭 ,因為喺十九世紀嘅時空,就話有少數資本家壟斷財富,今日仲有乜嘢富可敵國嘅家族?好多大企業,大股東係退休基金,退休基金養都係一班基層。你話ibanker啲人肚滿腸肥,但ibanker一被解僱,就一無所有,富貴榮華同生活無保證,可能成為日後被壓 迫嘅階級。所以我由過往嘅歷史,以至對馬克思理論嘅了解, 階級鬥爭 只係無賴嘅避難所。曾俊華連負入息稅都提出,雖然負入息稅係佛利民提出嚟,但唔少右派都有保留,因為負入息稅如果真係廣泛採行,其實真係同走向共產主義,或更接近共產主義嘅社會民主主義相若。我唔明社民連反對嘅理由。

林鄭月娥係工人階級出身,但佢嘅行為,一個背叛階級嘅人,唔係應該團結曾俊華、胡國興呢啲次要敵人,去打擊主要敵人。其實lesser evil論可以用好左翼,甚至好共產黨嘅語言講出嚟,而且成之有理。所以我睇完黃浩銘嘅講法,諗咗一日,依家社民連咁講 階級鬥爭 ,除咗變成政治無賴,我諗唔到其他更準確講法。

發表迴響

你的電子郵件位址並不會被公開。 必要欄位標記為 *