Payme

HSBC Payme :理念一流,執行九流

搞咗一大輪之後,終於我都用到 Payme ,其實一成功登記, Payme 個服務就有番作為一個銀行App應有嘅順暢,無論增值,定將啲錢轉番入自己銀行戶口都好快。 Payme 呢次搞到一鑊泡, Cherrypicks喺實施認證果部分係難辭其咎,相信寫成個電郵核證系統果條友,都有排被人問候祖宗十八代。因為只要你用facebook戶口登入,如果系統無抽中你再做電郵認證,你係即刻用到。用做電郵認證,就要等一等。

Payme 解決 Paypal 收費高昂嘅問題

雖然 Payme 出閘嚴重脫腳,但講要搶奪小型金融交易市場, Payme 應該可以帶前幾個馬位,除咗無費用,同埋大部分信用卡都食外,收錢果個都唔麻煩,分分鐘以後好多拍賣交收,或者小額交易,費時去ATM就去晒 HSBC Payme。而且我睇 HSBC Payme 交易係當一般簽賬,可以儲分,果啲里數黨、積分黨,仲唔事無大小都用信用卡交易,呢個亦係 HSBC Payme 一推出,就引嚟咁大反應嘅原因。相反,好多 Paypal 做開嘅交易,就有可能被人食咗唔少佔有率,因為依家 Paypal 嘅收費好貴,但服務就真係承傳一貫ebay傳統,差到頂點,呢個亦係我雖然用 Paypal 收錢,但心底裡面仍然唔係太鍾意 Paypal 嘅一個原因,你打過 Paypal 嘅客戶服務熱線,就應該明白我點解對 Paypal 嘅客戶服務咁有保留。

只不過,日後成個 HSBC Payme 軟件同系統嘅維護,仲係唔係咁外判法,我個人好有保留,因為依家負責嘅Cherrypicks往績太彪炳,會影響一般人對HSBC Payme 嘅信心,畢竟電盈 Tap and Go同埋八達通好易俾,都係無心鑊氣,至少對我呢個收錢嘅人嚟講,呢兩個系統可靠度都好高嘅,但依家大家用 HSBC Payme 俾錢,最好俾一俾張screen capture我睇,對雙方都有保障,雖然依家都好明顯,Cherrypicks班友喺個email verification system度寫到炒粉,咁都炒得粉嘅公司係乜公司,大家諗諗。

發表迴響

你的電子郵件位址並不會被公開。 必要欄位標記為 *