anova-min

Anova 慢煮器話我知:最穩陣嘅工作能力係創業能力

Anova 慢煮器,雖然香港無正式代理,但以前我都賣過嚟香港,亦曾經想傾代理權,但後嚟停咗。依家明點解,因為 Anova 已經被 Electrolux 收購,相信不久嘅將來,係 Electrolux 門市部見到 Anova 嘅產品。

雖然 Anova 慢煮器嘅市場前景,我無緣分一份,只不過, Anova 慢煮器被 Electrolux 收購,以至好多矽谷嘅故事都話俾我聽,其實天下間最「穩陣」嘅一份「工」,就係你雙手嘅創業能力。

Anova 係一份投名狀

根據 Electrolux 嘅公告,除咗用咗兩億美金收購間公司,仲會喺 Anova 基礎上,Electrolux 喺三藩市成立智能家電部門。好多香港人以為,要做到 高層係要靠擦鞋上位,但依家嘅潮流係,當你創業,果門業務被大公司睇中,你可以一夜之間搖身一變成為跨國公司個別部門主腦,係大公司用一大筆錢買咗你間公司,你賺咗一筆,仲要禮聘你坐高層,擦鞋仔一世都做唔到呢樣嘢。

點解大公司要咁收購,因為大公司要靠一啲有創業、創新經驗,而成功嘅人,為成間公司帶嚟新視野,迎接未來嘅挑戰。喺Internet of thing年代,Electrolux一定要走智能家電路線,但消費者真係需要乜智能家電,同埋點用至得架? Anova 團隊嘅視野,就係佢值得被 Electrolux 收購嘅理由。至少 Electrolux 面對 Samsung、LG一類本身有堅實IT業務嘅電器公司,唔輸蝕太多。

當然,創業能力仲有一個好處,就係一個政府點封殺你,你都唔會死。一如史明流亡日本期間,賴以維持《台灣四百年史》撰寫嘅資本,其實係佢喺東京開嘅餐館新珍味,一個馬克思主義嘅理論家,用咗最資本主義嘅方法,去實踐佢嘅理想。亦因為史明呢個能力,史明有條件唔淌從政呢堆渾水,有佢理由。

創業呢樣嘢,條條大路通羅馬,好多公司崛起唔係靠金錢資本,而係靠腦資本,只不過,香港人一定認為穩定係做公務員,或者炒炒賣賣,當一個全球化之勢仍然無法可擋嘅大勢來臨,我食花生睇住呢班友驚揘失措。

發表迴響

你的電子郵件位址並不會被公開。 必要欄位標記為 *