鼠患

銀行有 鼠患 有乜奇?香港政府都唔理嘅

喺facebook瘋傳,沙田東亞銀行分行出現 鼠患 ,大大隻老鼠周圍走,完全唔怕人,而東亞銀行嘅職員完全唔知點應對。

當然,呢次東亞銀行出現 鼠患 ,無論房屋署,定係領展都要查查發生乜事,因為商場係由領展管理,而新翠邨有無 鼠患 ,房屋署作為當地最大業主,都要負起相當大嘅責任。只不過,香港 鼠患 橫行,本身都唔係新聞,港島西環同上環一帶,都成日深夜遇到大大隻老鼠通街走, 鼠患 問題本身唔係新聞,只不過呢次出現喺東亞銀行分行,至令老鼠問題登到上報紙。

高永文有無做好治 鼠患 工作

喺香港仲有兩個市政局果陣,成日都喺街上啲坑渠,見到有市政總署或區域市政總署嘅通告,話已經落咗毒鼠藥,叫市民小心。但近年,少見好多食環署嘅治鼠通告,食環署出動滅鼠次數係唔係懶咗,同埋依家食環署用嘅毒鼠藥,係唔係香港啲老鼠已經適應咗,發揮唔到消滅老鼠嘅作用,當老鼠咁樣大街大巷通街走果陣,食環署喺懲治老鼠方面嘅表現絕對要問責,我已經唔計經常喺街上發現令女士花容失色嘅小強。

另一方面, 鼠患 肆虐,小強一地都係,除咗食環署嘅防治蟲鼠組有問題,依家食環署有無喺食肆衛生上揸正嚟做,好多蛇蟲鼠蟻問題,其實同啲食肆有關,但香港仍然有唔少唔衛生嘅食肆,夜晚見到啲碩鼠喺啲食肆走嚟走去,呢個已經唔係老鼠或小強嚇死人問題,而係有可能影響香港市民嘅食物衛生,究竟依家香港政府有無注重過食肆衛生問題。我已經只係講應該無老鼠同小強,我都未講長年以嚟好多食肆嘅公廁衛生簡直係嚇死人嘅問題。

鼠患 重現香港,證明呢個政府嘅管治能力出咗問題,政府官員無問責嘅心,而廢咗兩個市政局後,啲官員無民選實權議會直接監管,啲人越嚟越懶,結果依家咪出現惡果。所以,香港係有必要恢復兩個市政局,或者將區議會改組,成為有實權嘅town council,如果 鼠患 問題同小強問題唔解決,我就嚟建議將啲喺街上見到嘅蛇蟲鼠蟻,送晒去董建華屋企。無錯,無董建華要殺咗兩個市政局,香港幾時會出現街上老鼠無皇管到呢個程度。

發表迴響

你的電子郵件位址並不會被公開。 必要欄位標記為 *