TVB-植入式廣告

通訊辦要偏幫 TVB 可以有幾盡

自 TVB 變咗CCTVB,成為黨嘅電視台後, TVB 受嘅政策偏幫就越嚟越多同離譜,其中最受關注,係通訊辦就電視台嘅植入式廣告進行諮詢,好明顯係為 TVB 度身訂造,為咗延續 TVB 嘅商業能力,漠視通訊辦對大氣電波佔用人最基本嘅要求。

TVB 迫人睇廣告嘅方法

自錄影機興起,電視觀眾開始有能力,利用去廁所以外嘅方法唔睇廣告,而數碼廣播之後,如果用數碼錄影機,飛廣告更係易如反掌,攞個 MP4 或 AVI 檔出嚟,就可以飛起啲廣告,所以就有植入式廣告,去回應廣告商一定要觀眾見到廣告呢個訴求。而綜藝節目同劇集,就係各大廣告商想植入廣告嘅目標。而對付契丹果啲插入自己廣告,當香港電視廣告係死嘅地方電視台,植入式廣告亦令呢啲地方偷訊號嘅電視台無嘢好玩,所以,植入式廣告能否放寬限制,對 TVB 嘅生存係非常重要。

所以呢幾年, TVB 寧願被人罰,都要植入廣告,有錢賺最緊要

日期 節目名 植入產品
2013年12月3日 劇集衝上雲霄2 維他飲品
2014年2月19日 大班群星添戲Fun 冰皮月餅
2014年4月30日 劇集法外風雲 飲品
2016年5月24日 萬千星輝賀台慶 肯德基家鄉雞

問題係,近年 TVB 啲植入式廣告,已經去到膠爆嘅地步,飲品果啲仲可以勉強接受,如果講到突然台慶成班友喺度食家鄉雞,呢啲瘋狂節目模式,我真係識條鐵。如果係網台,大家最多係恥笑佢,《100毛》都擺明係網上狂賣植入式廣告,但網絡唔涉及大氣電波,但無線用嘅大氣電波係公共資源,咁樣濫用嚟播放啲咁嘅廣告,真係有點兒那個。

TVB 要生存,講到底,係要變番一個為民發聲嘅電視台,唔係做政權走狗,新聞部日日喺度歪曲事實至得。 TVB 本來已經無人睇,而玩植入式廣告太濫果啲劇集都收視差,依家仲要放寬植入式廣告限制,TVB 遲早變成亞視翻版,香港啲電視台就係咁樣搞死自己。依家係互聯網世代,內容太多,時間太少,廣告商要落廣告,落都落網上有quality有traffic嘅內容,唔係喺 TVB 係咁用植入式廣告嚟派膠。

但可以肯定,通訊局係偏幫 TVB ,令人質疑通訊局係咪仲政治中立。

發表迴響

你的電子郵件位址並不會被公開。 必要欄位標記為 *