林鄭辦公室-的士

林鄭辦公室 的士政策 嬲嬲嬲嬲

反對的士加價,正常嚟講,咁嘅post係會呃到好多like,只不過, 林鄭辦公室 係呃到一大堆嬲返嚟。因為,乜嘢page反對的士加價,都可以唔駛提政策建議,但 林鄭辦公室 個老闆,亦即係林鄭月娥,佢係有份搞出依家香港的士問題其中一個人,佢係有責任回應,一旦佢當選咗行政長官,會點樣解決依家嘅的士問題。

林鄭辦公室 仲衰過啲得個講字嘅民主派

民主派喺的士問題得個講字,梗係要丙,大家仲記得蠢到喺香港仔隧道開快車嘅冚家富同湯渣兩條友反對八折的,八五折的,依家害到香港市民幾慘至得。但 林鄭辦公室 如果講到自己當選咁有信心,咁係咪會推出一個的士改革藍圖,例如喺當選後一百日,大量發的士牌,令的士牌價跌到一個合理水平。又或者,提出一啲新嘅監管措施,令香港市民可以搭平的士。甚至再民粹啲,上台第一日,就取消梁振英批准的士加價嘅決定,有講過呢啲嘢,雖然包括我在內嘅人,都會認為你 林鄭辦公室 同林鄭月娥班友係吹水,因為林鄭月娥邊可能得罪班契丹炒牌佬,同埋譚惠珠至得,但至少唔會呃咁多嬲。依家係,你 林鄭辦公室 班友喺的士加價問題上無方案,係學薯片咁話取消TSA嘅實質主張都無,就想學人呃like,你無病嘛。所以最終結果,就係呃咗一大堆嬲返嚟。

林鄭月娥為咗挽回民意上劣勢,一定怪招盡出,預計呢類呃like post會越嚟越多,但呢個世界係無免費午餐,唔想得罪梁振英後面果班人渣金主,又想呃到民意,邊有啲咁便宜嘅事。至少喺灣仔運動場問題上,曾俊華已經擺明得罪咗梁振英後面嘅二線地產商,你林鄭月娥敢咩?我睇唔到 林鄭辦公室 呢班友有呢個吉士。要堅係攞番民意,唔該喺的士問題上,係俾啲實質承諾,開支票話取消的士加價係min pay,最好份政綱裡面,有完整嘅的士牌照政策俾大家睇得到,而唔係依家咁,又敢唔攞政策出嚟,又要想呃like。

當然,我就連嬲都費時俾,免得推高佢嘅interaction rate,對 林鄭辦公室 個垃圾page,最好係嬲都唔俾,unlike佢,亦唔follow佢。跟住剩番啲五毛搞interaction rate果陣,就慢慢捉晒啲五毛出嚟玩。

發表迴響

你的電子郵件位址並不會被公開。 必要欄位標記為 *