張曉明

習系準備用乜罪名去炮製 張曉明

喺中共嘅權鬥邏輯裡面,點搵條乜嘢罪去炮製自己嘅政敵嚟得理直氣壯,一直係一門學問。其中,搞獨立,搞分離主義,呢條罪狀一向係中共最鍾意用,由對付達賴喇嘛,到對付啲自決派都係咁。只不過呢次,就到有人想用呢條罪嚟對付 張曉明 。

話 張曉明 搞港獨

根據最鍾意歧視中國人嘅澳洲籍大律師馬恩國講,任何自決都係港獨,馬恩國大律師不愧係共產黨人嘅子女,好清楚中共嘅砌生豬肉哲學。同樣,如果中共定性你係搞地方保護主義,做土皇帝,呢個係違背中央嘅一等死罪,同搞港獨係一樣。喺共產黨,你貪污枉法未必要鬥到你死為止,但如果你要做土皇帝,就一定保證鬥到你永不超生,薄熙來點解被人鬥死,除咗呢條友同習近平爭位外,薄熙來借重慶直轄市,大搞獨立王國,呢條本身都係一條砌人生豬肉必死嘅死罪嚟。

依家《成報》公開話到, 張曉明 要做南方土皇帝,其實同話 張曉明 想搞港獨無分別,如果張德江要用反港獨,DQ游蕙禎同梁頌恆兩位國會議員得咁過癮,同樣,為維持中央政府嘅權威,一旦真係要鬥垮鬥臭 張曉明 ,成頂港獨帽子都會飛到佢頭上。甚至 張曉明 嘅死法同下場,會好接近薄熙來,因為游蕙禎、梁頌恆唔係黨嘅人,而 張曉明 身為黨嘅人,咁樣玩獨立王國,呢條死罪係一定好大鑊。

《成報》今日嘅報導,無論話張德江洩露政治局會議內容,等同洩漏國家機密,到指責 張曉明 要做南方土皇帝,呢啲都反映咗,《成報》後面嘅習系,已經準備咗一系列罪名,只要時機成熟就會攞嚟炮製 張曉明 ,甚至係張德江。係中共權鬥白熱化之際,《成報》固然會反映習系嘅憤怒,以及為鬥垮政敵不惜一切嘅決心,受中聯辦影響嘅傳媒,為咗回應《成報》,相信啲內容亦都會十分之爆。而呢場《成報》與中聯辦嘅惡鬥,唔會因特首選舉而結束,因為中共現時最大嘅政治交鋒,其實係今年九月舉行嘅中共十九大嘅人事安排,而人事安排會喺呢幾個月搞掂。如果喺特首選舉前後, 張曉明 突然離開香港,明升暗降嘅話,相信好多上洗頭艇果個,其實就係 張曉明 。一個被指要做土皇帝嘅人,係活罪難饒。

發表迴響

你的電子郵件位址並不會被公開。 必要欄位標記為 *