財務中介

財務中介 監管嘅問題:根本係成個放債人條例執行都係膠

財務中介 變咗另類大耳窿問題,已經造成困擾,雖然政府已經出廣告,但 財務中介 變咗模式去放數,結果問題仍然未解決到,令大家疲於奔命。

其實 財務中介 變咗邪魔,歸根究底,就係依家放債人條例執行有問題。

點可以由公司註冊處處長兼任放債人註冊處處長:縱容不當 財務中介 之始

雖然依家《放債人條例》有指明要有一位放債人註冊處處長,但呢位註冊處處長,一般係公司註冊處處長兼任,並且警務處協助個註冊程序,由於公司註冊處嘅職能,根本唔係處理金融相關嘅規管同問題,變成成件事根本九唔搭八。公司註冊處話處理文件就叻,你叫佢做放債人嘅金compliance,禁止放債人聘用不當手法 財務中介 ,你覺得可能?更加唔好講啲立法會議員講,要同 財務中介 進行註冊同監管。

要有效監管 財務中介 ,首先要將放債人條例果位放債人註冊處處長,由原本公司註冊處處長兼任,改由金融管理專員兼任,由金管局去監管呢班友,因為金管局本來有班人睇住銀行,咁要睇呢班放債人有無問題,就變得相對容易好多。另一方面,由金融管理專員去睇住 放債人 ,亦可以監管埋銀行將資金放俾放債人嘅狀況,因為財務公司本身,就係銀行嘅高風險客戶嚟。

依家 財務中介 之所以可以亂嚟,因為放債人條例下嘅財務公司,根本搞貸款,唔駛voice log,或者作出要監管嘅文件紀錄,無放債人合作,你覺得 財務中介 可以咁容易做到生意。甚至根本有啲放債人,係借呢啲 財務中介 去收取不必要高嘅利息。而純粹由公司註冊處去規管呢樣嘢,根本係唔理想。

另一方面,香港好多放債人,講句難聽啲,都係背景可疑,一係銀行自己開一檔財仔,進行一啲高風險嘅借貸業務,根本應該納入由金管局去管,去保障銀行存戶同埋小股東嘅利益,一係果啲所謂放債人,可能涉及洗黑錢或者黑社會活動,雖然依家放債人牌照審批,警務處處長係可以反對有關申請,但以公司註冊處嘅規模同監管能力,我真係好懷疑警方可以手頭上掌握幾多料去打擊涉及洗黑錢行為果啲放債人。呢啲怪物,一早應該進行打擊。

發表迴響

你的電子郵件位址並不會被公開。 必要欄位標記為 *