林鄭月娥

林鄭月娥 嘅copycat戰略:以累進利得稅為例

林鄭月娥 宣布參選咁耐,一直未有完整政綱,作為一個處心積慮出嚟選嘅人,無理由依家政綱都無,所以一直懷疑 林鄭月娥 係玩copycat,見邊個候選人嘅政綱好就抄邊個,東抄西襲。而喺累進利得稅呢件事,證據就好鬼明顯不過。

人提你先提, 林鄭月娥 仲唔係抄功課?

如果呢場選舉真係鬥理念, 林鄭月娥 又堅係仲有庫務科年代啲know-how嘅話,唔駛等到公布成份政綱,都應該對稅制改革可以作出自己嘅理念,一如曾俊華仲有喺波士頓教育局果陣嘅know-how,一出手就話唔要TSA一樣。依家係曾俊華提咗, 林鄭月娥 至話都好,咁我寫埋入去喇,呢啲仲唔係明抄功課,抄到咁核突,佢都算係香港政壇嘅經典。

只不過,我可以講, 林鄭月娥 會模仿曾俊華嘅做法,但部分同梁粉核心利益有關嘅政策, 林鄭月娥 係唔會抄,我依家至少列舉到以下曾俊華政綱部分, 林鄭月娥 係唔會抄:

  1. TSA(應該同中聯辦控制嘅課本出版商利益有關,所以唔准郁)
  2. 灣仔運動場拆遷
  3. 六成市民住喺公營房屋
  4. 檢討一筆過撥款
  5. 政府內部部門架構回復彭定康時代(依家個架構係梁粉搵食用)

所以喺 林鄭月娥 明知佢會抄書,但又唔會掂梁粉核心利益嘅情況下,其實仲駛乜睇政綱,曾俊華政綱唔得罪梁粉果部分,再加上對梁粉嘅利益輸送,呢個就係 林鄭月娥 嘅政綱,光係阻止 林鄭月娥 向梁粉輸送利益,就係支持lesser evil論,至少送曾俊華入閘嘅理由。當然,送埋胡國興入閘都okay。

送唔送葉劉淑儀入閘,我覺得,如果葉劉淑儀願意喺泛民舉行嘅儀式裡,好似乞兒收施捨咁收提名票,咁咪俾若干提名票俾佢,呢種當眾奚落希師奶嘅做法,足以報仇有餘,我就睇希師奶會唔會以捍衛佢髮型嘅意志,捍衛佢入閘出戰嘅權利。只要新民黨啲人唔放佢飛機,我諗泛民要施捨俾佢啲票,最多二三十張,乜都夠。但條件,係果二三十張飛,要喺一個充滿奚落希師奶嘅儀式下舉行,咁樣一定比梁國雄出戰小圈子選舉,更加突顯到小圈子選舉嘅荒謬同無稽之處。

至於梁國雄,基於戰略考量,左膠要俾佢,我阻止唔到,但如果變成民主罪人,佢地一世英名盡喪。

發表迴響

你的電子郵件位址並不會被公開。 必要欄位標記為 *