梁國雄

梁國雄 選特首嚟把叉?

雖然曾傳出有人成功勸退 梁國雄 唔好選特首,但喺一眾左膠自毀公信力嘅攻勢下, 梁國雄 最終都係出嚟選特首。而對左翼運動嚟講, 梁國雄 呢次出戰,簡直係災難級嘅毀滅,我完全唔明 梁國雄 決定背後嘅戰略合理性喺邊度。

梁國雄 出戰特首有幾毀滅性

點解我話 梁國雄 出戰特首,對左翼運動係一場毀滅,而並非拯救成個民主運動,理由如下:

  1. 梁國雄 呢次出戰特首,同十年前佢反對梁家傑,同五年前反對何俊仁出戰特首嘅理由完全係相反,當磁浮龍門成為咗事實果陣,日後無人再信左翼講嘅嘢。
  2. 梁國雄 出戰特首,即係過去咁多日以嚟,左膠對lesser evil策略嘅攻擊,唔係出於公義,而係出於私心,以後泛民嘅支持者,根本唔會再認為左翼係一班真心膠,反之,係一班自私精。至少今日樹仁大學班泛左翼學生示威,我已經認為有可能為 梁國雄 招致選舉開支,係有必要質疑
  3. 喺明知林鄭月娥好可能喺西環高票加持下獲得提名,民主派325張提名極其珍貴嘅情況下, 梁國雄 仍然堅持嘅話,如果出現曾俊華同胡國興入唔到閘,但佢同林鄭月娥對決,結果就係白白俾林鄭月娥贏特首,延續五年梁振英暴政,泛民支持者憤怒可想而知
  4. 如果為公民提名而選嘅話,可能更蠢,依家唔少認為要保住曾俊華同胡國興提名權嘅泛民,會加緊喺香港大學popvote度提名曾俊華或胡國興,屆時梁國雄得唔到足夠公民提名,甚至曾俊華同胡國興得到大量公民提名果陣,左翼死得更慘

對 梁國雄,我雖然係港獨/歸英右派,但我對佢係敬重,至少敬重佢嘅人格以及堅持,但呢次 梁國雄 嘅愚蠢決定,好可能令 梁國雄 臨老唔過得世。長毛,咁何必呢?臨老唔過得世嘅事,點解唔交俾某啲行事古怪嘅過氣名嘴做,而係要自己去做。依家嘅客觀結果係,以後泛民左翼唔會再有市場,就算呢班友講得再大聲,再霸佔道德高地,因為泛民支持者唔認為呢班友係有道德,純粹出於天真做啲蠢事。我只能講, 梁國雄 選特首嚟把叉,不如食吓花生好過喇,嘥錢嘥力嘥時間,做啲近乎政治自殺嘅行為,我真係睇唔到當中嘅意義,真係得一個蠢同奸嚟形容。

發表迴響

你的電子郵件位址並不會被公開。 必要欄位標記為 *