Donald Trump

英國國會下議院議長唔歡迎 Donald Trump :認真大鑊

雖然英國政府堅持請 Donald Trump 訪問英國,但英國國會下議院議長 John Becrow 嘅回應,可能令 Donald Trump 呢次來訪非常無癮,就係佢個人反對 Donald Trump 訪問我國期間,喺國會致詞。

喺我國憲政傳統而言,議長講啲咁重嘅說話,十分之大鑊, Donald Trump 就算訪問我國,亦將會極為面懵,去嚟唔知有乜意思。

Donald Trump 去國會致詞重要過見英女皇

我國嘅憲政邏輯係國會無上論,亦即元首雖然係英女皇,但國家主權實際掌握喺議會,所以,訪問我國最重要,其實係去國會致詞,見英女皇係新聞上好睇,但喺政治含意上,美國元首見英國主權實際擁有者,亦即上下議院一眾議員,至叫真正對等嘅訪問。

依家國會議長放話唔歡迎 Donald Trump ,House of Commons 嘅 speaker 係地位超然,有幾個理由

  1. speaker係全體國會議員選出
  2. speaker一被選出,speaker會即時退出原有政黨,變成獨立議員
  3. 各黨傳統上,唔會派代表挑戰speaker嘅議席

speaker代表,係各黨嘅共識同意志。依家議長講明唔歡迎 Donald Trump ,政府點好意思堅持邀請 Donald Trump 喺國會演講,仲要呢項主張,得到SNP、工黨、自由民主黨支持,而John Becrow係原屬保守黨嘅,咁你話,依家文翠珊政府點算好?

喺呢個風頭火勢,如果 Trump 訪問英國,唔係搞到執政黨同國會關係緊張,其實都仲可以繼續請佢去。但如果 Donald Trump 依家來訪,係無法得到喺國會致詞嘅禮遇,咁為免 Donald Trump 尷尬,咁不如唔好叫佢嚟好過。依家係變咗,請 Donald Trump 嚟,係更大嘅羞辱嘅話,咁對 Donald Trump,以至英美之間嘅關係,係一啲好處都無。等travel ban呢件事無咁惹火,再邀請佢訪問英國都未遲。我真係留名食花生,等 Donald Trump 喺 Twitter 回應 John Bercow。(雖然國務院官員唔想佢咁回應,會死的)

發表迴響

你的電子郵件位址並不會被公開。 必要欄位標記為 *