英國國鐵

英國國鐵 嘅問題:學JR學一半唔學一半嘅結果

英國國鐵 車費貴,效率差,就算私有化都依家大嗌搞唔掂。雖然工黨過往嘅重新國有化政策係白痴嘅,只不過,依家 英國國鐵 果啲專利權承辦商,佢地啲表現好多都令人不敢恭維,如果唔係都唔會咁令人怨聲載道,同埋點解倫敦市郊國鐵網絡通勤化,最後係由港鐵公司出手,由遠東嘅弟子教番歐洲嘅師傅營運。

其實 英國國鐵 嘅問題,以我呢個半鐵膠嚟講,係私有化半天吊之過。如果好似日本國鐵咁私有化得狠下決心一啲,就唔會搞到咁硬膠。

無私鐵競爭 無地產收益 英國國鐵 玩私有化玩條毛

日本國鐵私有化,一向係經典成功私有化嘅案例,日本JR東日本、西日本、東海同九州嘅營運水平都理想,係剩低嘅JR北海道、JR四國同JR貨物,因為營運嘅地點,同業務性質,一定要捱。日本國鐵私有化成功,一方面雖然日本政府保有鐵路網絡擁有權,但鐵路網絡嘅保養升級,係由JR公司做,另一方面,JR既係地產同百貨公司,但本身又要同其他私鐵競爭。關西私鐵同JR打到難分難解,呢個係大家都知,否則唔會有京都-大阪-神戶嘅新快速。簡單嚟講,日本國鐵嘅私有化,係一個真嘅私有化,簡單嚟講就係國鐵私鐵化,變成另一啲大手私鐵。如果唔係國鐵私鐵化,日本嘅鐵路服務水平,恐怕仲係維持喺一個會引發暴動嘅水平,並唔係今天大家去日本旅行果陣享受到嘅JR服務。

但 英國國鐵 私有化,其實私有化咗啲乜,原來好似巴士咁,只係個營運外判咗,鐵路由政府擁有同維護,但英國又無私鐵呢樣嘢,而 英國國鐵 專利權擁有者,又唔多好似日本同香港啲鐵路公司咁,充分利用火車站地產項目嚟賺錢,問心講果句,齋靠鐵路票價真係可以應付列車同維修各方面投資?車費從來都唔係賺錢之路果陣,咪犧牲晒車輛可靠度同準時。

如果我係英國政府,係要檢討 英國國鐵 營運,好可能由鼓勵私鐵投資,同埋容許專利權擁有者,充分運用火車站物業嚟賺錢,呢個至係一個可行出路,照依家嘅模式咁玩落去,咁英國人慢慢忍果啲又貴不唔準時嘅列車服務。

後話:大家唔好怪港鐵公司,點解係半個地產商,無地產收益補貼,港鐵車費隨時貴到hihi。依家香港嘅人工同地價,仲存在兩個站低過140日圓車費,無物業補貼我真唔知點做到。唔好同電車公司呢個怪物比。

發表迴響

你的電子郵件位址並不會被公開。 必要欄位標記為 *