監警會

俾 監警會 獨立調查當更警同休班警咪可以鏟除壞分子

唔知幾時開始,當更警同休班警鬥犯罪數字多,由於個數字係近年最誇,所以連警務處長盧偉聰都話,要鏟除警隊壞分子。不過,警察都係人,如果由依家警隊內部力量,再加廉署去鏟除警隊壞分子,鏟到盧偉聰退休都未完。喺鏟除梁粉後嘅 監警會 ,如果能夠賦予獨立執法同調查權力,或者可以遏止當更警同休班警嘅「犯罪競賽」。

監警會 扮演類似廉署超然角色

自己人查自己人係無好結果,其實呢個係常識嚟,喺廉政公署成立前,警隊都會查貪污,問題係,警隊因為自己人查自己人,貪污問題根本根治唔到,所以至搵MI5訓練班人成立廉政公署,並且賦予極大嘅實權。同樣,如果由警隊內部查自己嘅犯罪問題,以警隊嘅盤根錯節嘅網絡,依家已經咁離譜,實際上係唔係離譜n倍。

英國人好清楚呢樣嘢,英國嘅 監警會 ,至少喺英格蘭同威爾斯嘅 監警會 ,係好有調查權。以下類似嘅警員違法投訴,係一定要交俾 監警會去查

  1. 嚴重襲擊(類似朱經緯案)
  2. 嚴重性犯罪(類似旺角警署強姦案
  3. 嚴重貪污(英國要,香港唔駛,因為英國無廉署)
  4. 任何紀律問題,同上述幾項嘢有關
  5. 涉及性別、種族、宗教或其他歧視相關嘅刑事罪行

當然由於英格蘭同香港環境唔同,所以唔駛百分百跟足,至少貪污相關罪行調查權力,就算係涉及警員都應該交番俾廉署。但好似朱經緯案,警員喺法院當眾作假證,喺警署強姦、非禮市民或同袍等等,就唔該交俾 監警會 ,由擁有執法人員一樣權力嘅人去調查,並且可以自己掟檢控上法院,費時自己友查自己友,結果好多罪行被掩蓋,而爆得出嚟果啲,都係紙包唔住火嘅一等嚴重罪案,執法人員嘅權威,就係咁樣淪喪。

當然,如果呢個政府仲係當警隊係維穩部隊咁用嘅話,政府係唔會真係做嘢去鏟除呢啲罪案,結果當更警同休班警犯嘅罪會越嚟越過份,而香港治安會係點,其實大家都估到,屆時香港人未必因政治理由移民,但可能因治安理由移民,一個兵賊難分嘅社會,作為一般市民,點可能安居樂業到至得架。兵賊難分呢個老問題,終根究底,都係無check and balance嘅問題。

發表迴響

你的電子郵件位址並不會被公開。 必要欄位標記為 *