林鄭月娥-派膠

2月4日: 林鄭月娥 全日派膠

2017年2月4日,無乜太多曾俊華同 林鄭月娥 之間嘅交鋒,一方面,曾俊華嘅眾籌只要數字上保持強勢,就已經足以喺火力上壓制林鄭月娥至公布manifesto果日為止,另一方面, 林鄭月娥 今日可以全日一個人不斷派膠,喺呢個形勢下,我只能分析 林鄭月娥 成個周末喺度派膠嘅情況。一個候選人可以不斷派膠,派到永無止境果隻,真係得香港呢啲畸形選舉至可能發生。

林鄭月娥 究竟派咗幾多膠?

究竟 林鄭月娥 嘅派膠力有幾厲害,我可以用以下嘅表同大家講吓。

時間 膠事
1600 HKT 左右 初步回應we-connect事件,話同行同we connect要一齊睇嘅
1900 HKT 左右 回覆各網媒查詢,將we connect事件責任,全部推到劉小康同埋劉小康嘅年青人團隊身上
2200 HKT 左右 話眾籌可能犯法,但特首選舉指引附錄十八,根本無謂眾籌犯法

如果係真普選,其實 林鄭月娥 根本唔駛選落去,因為一個月派落嚟累積嘅膠,加上日日都可以透過把口嚟派膠,實兵敗如山倒,無可能選落去,但由於 林鄭月娥 依家係靠中聯辦控制果啲鐵票去入閘,佢以為靠中聯辦攞住雞毛當令箭嘅恐嚇,可以喺呢五十日將商界嘅選委陸續歸邊,令自己贏得選舉,所以 林鄭月娥 至可以好厚顏嘅選落去。

而 林鄭月娥 嘅派膠,亦反映咗 林鄭月娥 嘅性格缺陷,將we connect事件嘅責任推晒落劉小康身上,好明顯反映咗 林鄭月娥 嘅縮骨卸膊性格,成為麥齊光指控嘅活註腳。而話眾籌唔合法呢樣嘢,反映 林鄭月娥 自己知道唔可能有同等嘅反應。大家要知道,契丹嘅五毛好多,但契丹嘅五毛唔可以參與眾籌,因為一參與咗就浮上水,見光死。而你叫周融同埋政研會啲人去捐錢,一來唔知有無咁多馬出嚟(大佬,至少call三萬人至可能有機會over曾俊華),二來,要佢地先磅水,咪玩喇。眾籌係好難偽冒嘅民意嚟,所以我話眾籌公信力不亞於公民提名。 林鄭月娥 咁抹黑眾籌,證明呢個女人對自己嘅民望有幾心虛。

發表迴響

你的電子郵件位址並不會被公開。 必要欄位標記為 *