林鄭月娥-we connect

林鄭月娥 呢個係你嘅選舉 唔係劉小康嘅選舉

林鄭月娥 同情趣產品we connect拉上關係一事,本來由SEO角度, 林鄭月娥 都係趣趣地認衰算,原理費時講。只不過,似乎 林鄭月娥 諉過他人嘅性格作崇,所以 林鄭月娥 喺禮拜六黃昏發表聲明,話呢個口號同設計係劉小康,同埋啲年青設計師做,暗示又係唔關佢事,只不過劉小康同佢啲年青設計師(定判上判?)唔啱咋。

呢次劉小康抄襲,兼無做基本google check,毫不專業,固然係膠。只不過, 林鄭月娥 用佢一貫政府左推右推嘅太極功,有鑊諗住劉小康同埋啲年青設計師食咗算數,呢個世界無啲咁便宜嘅事。

林鄭月娥 呢場係你嘅選舉

政府公務員之所以做嘢無責任感,因為政府係一個龐大機器,正所謂鐵一般嘅衙門,流水嘅官,公務員可以換n個,但衙門係千年不變,所以 林鄭月娥 左推右推呢種生存之道,可以一次又一次幫佢過骨。越大嘅機構,濫竽充數嘅人就越多,呢個係好自然嘅事。

但依家 林鄭月娥 唔再係政府官員,佢依家係民選政客,仲要角逐擁有香港最高權力果個位,無論呢次選舉,定日後嘅施政,任何事好與壞,責任都喺佢身上。所以任何designer交個design俾你,一如商業機構同designer相處嘅方法,除非果個商業機構自己膠到指示designer抄某個設計(雖然香港經常發生),否則只要個designer交咗個design俾client,client有責任最後把關,因為有乜事,就係client食。依家 we connect 同性玩具撞到應,字型設計左抄 we connect ,右抄cnn,好明顯有人無做google search,依家就將責任推晒俾劉小康?咁最初出we connect果陣,你 林鄭月娥 有無俾credit劉小康先,劉小康咁樣食死貓法,係唔尊重而且好冷血。

有左膠話玩we connect幼稚,我唔認為咁睇,呢件事除咗好膠,隨住關公危機嘅深入,反映到 林鄭月娥 團隊可以有幾亂七八糟,以及點樣一次又一次出咗事除咗割蓆,就乜都唔識。上次麥齊光如此,今次劉小康如此,你諗住幫 林鄭月娥 , 林鄭月娥永遠只會諗到自己,跟得佢越埋,你死得越快。 林鄭月娥 身邊果啲人,我真係祝佢地好運。

發表迴響

你的電子郵件位址並不會被公開。 必要欄位標記為 *