we connect-林鄭月娥

we connect 災難可以為林鄭月娥帶嚟幾多次關公災難?

林鄭月娥宣傳口號同按摩棒嘅app we conncet 撞名,件事已經膠到爆炸嘅地步。本來呢單已經係好嚴重嘅關公災難,我唔知邊個負責林鄭月娥facebook page嘅操作,當有人攞呢件事抽水sell性玩具果陣,林鄭月娥官方戶口嘅粗暴回應,簡直去到嘆為觀止嘅地步,一件膠事可以核爆完又核爆,我都唔知幫佢搞公關果班友,係公關定係關公。

被攞 we connect 抽吓水sell嘢,駛鬼咁大反應呀

話說,有個叫今日香港嘅專頁,抽林鄭月娥嘅水,咁有性用品公司,乘機推銷有現貨賣都好正常,好可能平日啲人唔知原來香港可以買到呢啲玩具,依家可以買喎,呢啲都係商機嚟,抽水marketing係依家social media慣用嘅marketing技巧,唔識果個都唔駛喺香港撈。

啲marketer抽吓水推銷,其實大家由得佢就算,點知,林鄭月娥用佢官方個page嘅身份,咁樣回應

we connect-林鄭月娥
we connect-林鄭月娥
呢個回應,正正引爆新一輪嘅網上關公災難。林鄭月娥官方個page回應係咁

請你尊重自己,我並沒有此需要。

呢個回應,我嘅評語,係十分之差勁。

  1. 其實林鄭月娥陣營,根本唔應該用官方page戶口回應呢啲抽水marketer,對方係擺明insult你去做免費廣告
  2. 依家林鄭月娥係從政嘅政客,政客最忌無幽默感,依家無幽默感成咁,容人之量咁差,咁佢上台,係唔係肯定係第二個689?

本來呢單嘢係有更好嘅救火方法,依家 林鄭月娥死撐自己無抄嘢,又話要we connect連埋同行一齊睇,抄嘢抄到咁揚都仲要撐,本來已經好引人反感,依家嚟個咁粗暴嘅回應,程度之差,簡直連馮煒光都未必有咁膠,我可以講,呢啲粗暴反應會引發新一輪網上討論。一單關公災難越救越失控,已經去到切爾諾貝爾級事故級數,我真係唔知林鄭月娥仲諗住點選落去。如果北京聽中聯辦老點,動用手上鐵票支持林鄭月娥,我可以講,香港未來五年唔駛管落去。

當然未知果個戶口係唔係official,因爲無藍剔認證,如果係流嘅,請林鄭月娥選舉辦儘快澄清。

2 thoughts on “we connect 災難可以為林鄭月娥帶嚟幾多次關公災難?

發表迴響

你的電子郵件位址並不會被公開。 必要欄位標記為 *