林鄭月娥

林鄭月娥 話可能就同性婚姻立法:兵行險著

林鄭月娥 喺由黃永主持商台節目《人民大道中》裡面,講咗一樣嘢,明顯係兵行險著,反映出 林鄭月娥 喺民情下滑情況下,嘗試開支一啲唔知兌唔兌現到嘅空頭支票,呢一著係同姓婚姻立法諮詢。

林鄭月娥 對同性婚姻立法有幾大誠意?

林鄭月娥 話自己會撇除自己嘅宗教立場立法,但佢只係話唔排除就同性婚姻做諮詢,無話會推出立法,會提出一個具體可行嘅時間表,甚至任何中途站方案。

同性婚姻係一舊好大概立法議題嚟,唔係可以隨時含糊以對,但簡單嚟講,可以包含以下立法政策問題要考慮

  1. 現行性罪行法律,應否作出對應修訂,好似英國《2003年性罪行法》(Sexual Offences Act 2003)咁立法。
  2. 喺未修法前,會否容許外國使館幫自己嘅國民進行同性婚姻註冊
  3. 用民事結合(civil partnership)定婚姻呢個字眼
  4. 教堂有無權力opt-out進行同性婚姻儀式
  5. 同性婚姻下嘅夫妻可唔可以領養子女
  6. 《人體生殖科技條例》可唔可以就代母安排作出修訂

林鄭月娥 唔應該開空頭支票,應該講清楚佢就以上五個範疇嘅問題嘅立場,開空頭支票呃民望係無意思嘅。

但我個人睇法係,第1同第2可以先做,第1項先做,因為香港嘅性罪行法一早outdated,依家仍然有女姦男不可檢控強姦罪嘅膠問題,呢樣係黐線嘅。而第2項,只不過尊重各國國民本身權利,呢個方法,亦可以俾政府喺同性婚姻問題上,被明光社一眾宗教極端組織打到傻果陣,有一個出口暫緩香港喺呢方面嘅要求。特別台灣遲早會就同性婚姻立法,香港華裔人士理論上係中華民國國民,如果成棚人去台灣註冊同性婚姻(特別無BNO同加拿大籍果批),結果一定係會膠到一個點。 林鄭月娥 自己拋個波出嚟,就唔該講清楚佢具體想點,咪喺度模稜兩可,開啲奇怪支票出嚟又唔知想點。

為尊重宗教自由,我認為應該賦予教堂權利拒絕進行同性婚姻儀式,免招麻煩,同英國做法類似。而《人體生殖科技條例》下禁止代母條文,應予保留,以及同性婚姻下嘅夫妻,應該暫時唔可以領養子女,因為社會未對同性婚姻下嘅子女福利問題有共識,太激進嘅立法係只會招嚟硬膠。同性婚姻立法嘅目標,係清理現時同性伴侶喺財產繼承、緊急事故監護權(例如入醫院做手術簽字同意)等問題上造成嘅困擾,呢樣嘢本來無關宗教,係班基督教原教旨主義分子吓吓都上綱上線,明明民事問題都講成宗教問題。

發表迴響

你的電子郵件位址並不會被公開。 必要欄位標記為 *