盛智文

盛智文 係唔係應暫停TVB獨立非執行董事職務?

一直以嚟,大家都認為 TVB 新聞部政治立場有問題,所以被譏諷為CCTVB,但喺 CCTVB 公司結構上,係睇唔到有可能影響公正性嘅元素,就算副主席黎瑞剛係共產黨員,問題係,黎生表面上唔會介入香港政治或選舉。只不過,依家獨立非執行董事 盛智文 係林鄭月娥競選辦主席團成員,就有可能引發公眾疑慮。

盛智文 嘅位置與TVB獨立非執行董事一職有衝突

根據港交所嘅《上市規則》,獨立非執行董事,係指除咗喺公司無任何嘅職責外,佢喺收取公司嘅利益,就只有董事袍金,所以至叫獨立非執行董事(如果有揸股票,就唔可以稱為獨立董事),而獨立非執行董事,係必須代表公司所有股東嘅利益,監察同協助管理層制訂決策,所以係唔可以有任何利益衝突。

新聞作為無線其中一個主要業務,呢個係毫無疑問,亦係牌照要求。而依家 盛智文 既係TVB獨立非執行董事,而佢擔任主席團成員嘅林鄭月娥競選辦,明顯係新聞部嘅主要採訪對象,TVB新聞部點報導林鄭月娥, 盛智文 係會被視為有利益影響,咁依家擺明有利益衝突,點解無人理。仲要林鄭月娥嘅分享會,竟然得到TVB不斷嘅直播、轉播,已經足以令人懷疑邊個喺度影響新聞部運作。

盛智文 有呢種利益,對TVB呢間上市公司嘅企業管治都唔好,如果 盛智文 做林鄭月娥競選辦主席團成員,除咗最低限度要喺董事會作利益申報,我認為甚至要暫停相關職務直至選舉結束。而通訊辦,亦都無理由,可以當 盛智文 喺擔任無線獨立非執行董事嘅情況下,做林鄭月娥競選辦主席團成員係無事發生至得架。

雖然小圈子選舉,都講唔上公平公正,但呢類事例一開,日後要修補漏洞就好難,呢件事係需要作出仔細跟進,而政府亦都有責任,向公眾作出一個交代。呢啲睇 TVB 網頁都可以發現嘅問題,竟然可以無人跟進,亦都實在太荒謬絕倫。

發表迴響

你的電子郵件位址並不會被公開。 必要欄位標記為 *