曾俊華

假如 曾俊華 所有選舉經費都係眾籌籌番嚟

曾俊華 個眾籌計劃勢不可擋,由主機喺下午三點左右恢復,香港時間七點未夠,已經籌得110萬,有4550人認捐,平均每人捐助金額 253 港幣。

依家行政長官選舉開支上限係1630萬元,假如 曾俊華 所有選舉經費都係眾籌返嚟嘅話,而平均捐助金額不變, 曾俊華 嘅選舉工程,就係有六萬四千幾市民支持下作出。

曾俊華 嘅眾籌可視為公民提名

大家都知,依家特首選舉,係無一個合規格嘅公民提名機制。但有一樣,啲人出錢其實仲難過喺提名表上畫龜,我呢度都係靠捐助運作,我好明白香港呢個特質。所以恕我直言, 曾俊華 嘅眾籌,已經係一種公民提名,嚟自五湖四海,有香港銀行信用卡嘅市民,用自己嘅錢去支持一條友參選,呢種唔係公民提名嘅一種,又係乜。

假如 曾俊華 所有選舉經費或大部分選舉經費都係眾籌籌返嚟嘅話,其實泛民支持公民提名嘅選委,係唔係有責任貫徹上萬市民嘅意志,將提名交俾 曾俊華 ,我無話要求所有泛民選委都提名曾俊華,但至少令 曾俊華 攞到百五人提名資格。

我呢度好認真提醒左膠選委,夠薑攞全民退保作為篩選俾唔俾提名嘅準則,即係佢地個龍門係同中共一樣,根本都係一班篩選黨,咁佢地有乜資格要公民提名。當然,我認為梁國雄又好,胡國興又好,如果都可以有呢個眾籌水準,至少有幾萬市民願意捐錢支持出戰,呢兩個人都deserve泛民俾選委提名。問題都係果句,你要證明有堅過石堅嘅市民支持俾我,而 曾俊華 個眾籌,係一個好有力,難以否認嘅數嚟。

借眾籌嚟實現公民提名,其實你班泛民有無諗過,依家 曾俊華 諗多你地幾步,我真係好懷疑,泛民依家嘅政治轉數夠唔夠快。

發表迴響

你的電子郵件位址並不會被公開。 必要欄位標記為 *