麥齊光

麥齊光 都反林鄭月娥反映咗啲乜

相信好多人見到今日《AM730》頭版果刻,都唔相信自己對眼,支持曾俊華果個神秘人,竟然係前發展局局長,曾經係林鄭月娥嘅心腹 麥齊光 。

麥齊光 單案,大家可以姑且唔評論住。只不過,如果 麥齊光 唔係答應林鄭月娥做發展局局長呢個問責官員職務,又點會無啦啦被人搵番佢當年供樓單嘢出嚟。 麥齊光 因林鄭月娥一條友,經歷過咁多官非。講真,呢啲官非唔係好受。林鄭月娥在情在理,幫 麥齊光 寫番封求情信,都唔係太過份要求。

麥齊光 要咁向林鄭月娥贈慶反映啲乜

麥齊光 當年落難,林鄭月娥一封求情信都無俾,反而只係曾經喺公事上來往過嘅曾俊華,主動俾 麥齊光 求情信。有啲人嘅品性係點,其實唔難睇得出嚟。

由 林鄭月娥 送丈夫同子女去北京做人質,到 麥齊光 想要封求情信都唔俾,最後竟然係唔熟果個曾俊華俾求情信,可以反映到, 林鄭月娥 為求上位,你諗到有幾不擇手段都得,林鄭月娥呢種心狠手辣,有啲似 House of Cards 嘅主角,只不過換咗做一個女人, House of Cards 果個權力世界,係比梁振英果種純粹土共式粗糙鬥爭手段仲要恐怖得多,你當佢兄弟,佢當你契弟果啲嚟。

唔好講到 House of Cards 咁遠,講香港電視劇,由 麥齊光嘅遭遇,同埋林鄭月娥對子女嘅手法,另一個可之比較嘅人,係HKTV名劇《選戰》嘅其中一個主角,由廖啟智所演嘅宋漫山。喺劇裡面果個宋漫山已經好得人驚,大家諗吓如果現實香港由一個宋漫山咁嘅人當政,我睇情況真係衰過 麥齊光 落難果陣多多聲。

當我寫緊果陣,我感到一陣好勁嘅寒意,如果香港真係由林鄭月娥當政,我諗仲恐怖葉劉淑儀。葉劉淑儀係唔尊重民主,只不過佢果種膠,未至於背後開人幾槍,你死咗都唔知乜事果隻,林鄭月娥,你睇吓 麥齊光 囉, 麥齊光 依家仲行得走得,真係算佢大命。佢呢次敢出嚟賭,應該佢同林鄭月娥之間嘅怨恨,係非一般嘅深。

發表迴響

你的電子郵件位址並不會被公開。 必要欄位標記為 *